Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 604 Hüküm no: 745 Orijinal metin no: [132a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman b. Abdünnebi’nin Kurd Mehmed Reis b. Derviş’te olan alacağının terekesinden ödenmesi Mahmiye-i İstanbul’da Harâccı Muhyiddin mahallesi sâkinlerinden bâ‘isü hâze’l-kitâb el-Hâc Süleyman b. Abdünnebi nâm kimesne meclis-i şer‘-i şerîfde mahrûse-i Galata’ya tâbi‘ kasaba-i Tophâne’de Karabaş mahallesi sâkinlerinden iken bundan akdem diyâr-ı Mısır’da medîne-i Reşid’de ticâret üzre iken düyûnu terekesinden ezyed olduğu hâlde vefât eden Kurd demekle ma‘rûf Mehmed Reis b. Derviş b. Abdullah’ın sulbî oğlu ve terekesine vâzı‘ü’l-yed olan Sâlih nâm kimesne mahzarında üzerine da‘vâ ve takrîr-i kelâm edip mezbûr Mehmed Reis’e hayâtında târih-i kitâbdan üç sene mukaddem yüz guruşumu hayâtında bana def‘ ve teslîm ben dahi yedinden ahz u kabz edip elli guruşunu kable’l-edâ vefât etmekle hâlâ merkūm Sâlih’e suâl olunup tereke-i müteveffâ-yı mezbûrdan meblağ-ı bâkī-i mezbûrdan bana edâ ve teslîme tenbîh [132b] olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda mahalle-i mezbûre sâkinlerinden imâm Ahmed Efendi b. Ramazan ve Hüseyin Efendi b. Mehmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Kurd Mehmed Reis b. Derviş b. Abdullah hayâtında ikrâz ve teslîm ol dahi iktirâz ve kabz eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle oldukdan sonra müdde‘î-i mezbûr el-Hâc Süleyman meblağ-ı bâkī-i mezbûru dahi müteveffâ-yı mezbûrdan hayâtında ahz veya hibe veya âhar havâle veya turûk-ı şer‘îden bir tarîk ile zimmetini ibrâ etmediğine yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin mûcebince meblağ-ı bâkī-i mezbûru dahi tereke-i müteveffâ-yı mezbûrdan edâ ve teslîme merkūm Sâlih’e tenbîh olunup mâ vaka‘a bi’t-taleb ketb olundu. Fi’l-yevmi’l-âşir min Şevvâli’l-mükerrem li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Receb b. Hızır, Mehmed b. Abdullah, İbrahim b. Mustafa, Mehmed Çelebi b. Abdi, Ebûbekir Çelebi b. Abdi ve gayruhüm mine’l-huzzâr.