Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 604 Hüküm no: 746 Orijinal metin no: [132b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid İbrahim Çelebi b. Hacı Zeyneddin’in menzilini 47. Yeniçeri Cemaati Vakfı’na bey‘ bi’l-istiğlâl yoluyla sattığı Mahmiye-i İstanbul’da Müftü Ali Çelebi mahallesinde sâkin es-Seyyid İbrahim Çelebi b. el-Hâc Zeyneddin meclis-i şer‘-i şerîf-i enverde Dergâh-ı âlî yeniçerilerinin kırk yedinci cemâ‘atine mahsûs oda ahâlîsinin ta‘âmiyye[si] için nukūd-ı mevkūfelerine mütevellî olan bâ‘isü’l-kitâb Süleyman Çelebi b. Mustafa tarafından husûs-ı âti’l-beyâna sâbitü’l-vekâle vekîl olan Ahmed Beşe b. Hasan mahzarında ikrâr-ı tâm ve takrîr-i kelâm edip mahalle-i mezbûrede vâki‘ bir tarafı Ali Ağa vakfı ve bir tarafı Ali Çelebi mülkü ve bir tarafı el-Hâc Hasan mülkü ve bir tarafı tarîk-i âm ile mahdûd mülk menzilimi mütevellî-i mezbûre yüz esedî guruşa bi tarîki’l-istiğlâl bey‘ ve teslîm ol dahi mâl-ı vakf-ı mezbûr ile iştirâ ve kabz ve teslîm-i semen eyledikden sonra yine mütevellî-i mezbûr menzil-i mezkûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamâmına değin on esedî guruşa bana îcâr ve teslîm ben dahi istîcâr ve kabûl eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-âşir min Şevvâli’l-mükerrem li sene seb‘a ve tis‘în ve elf. Şuhûdü’l-hâl: Mehmed Çelebi b. el-Hâc Mustafa, Ali Çelebi b. el-Hâc Yusuf, Mustafa Çelebi b. Ahmed, Mehmed b. İdris, İbrahim Çelebi b. Ahmed.