Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 605 Hüküm no: 747 Orijinal metin no: [132b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf Efendi’nin eski eşi Ayşe bt. Ahmed ile hizmetçisine nafaka takdiri Min mümzâtihî Mahmiye-i İstanbul’da Murad Paşa-yı Atîk mahallesinde sâkin olup zâtı ma‘rifet-i şer‘iyye ile ârifân olup mahalle-i mezbûre ahâlîsinden Ali Çelebi b. Ahmed ve Hüseyin Çelebi b. Mustafa nâm kimesneler ta‘rîfleriyle mu‘arrefe olan bâ‘isetü’l-kitâb Ayşe bt. Ahmed meclis-i şer‘-i şerîf-i enverde takrîr-i kelâm ve ta‘bîr ani’l-merâm edip zevcim olup mukaddemâ Şumnu Paşası Dîvân efendisi olan Yusuf Efendi beni bilâ-nafaka terk edip âhar diyâra gitmekle benim ve bir hâdimemin nafaka ve kisve ve sâir levâzım-ı zarûriyyesi için kıbel-i şer‘den zevcim gāib-i merkūm Yusuf Efendi üzerine kadr-i ma‘rûf akçe farz ve takdîr olunmak matlûbumdur dedikde hâkim-i muvakki‘-i sadr-ı kitâb -tûbâ-lehû ve hüsnü me’âb- hazretleri dahi ba‘de’t-tahlîfi’ş-şer‘î ber vech-i meşrûh mezbûre Ayşe Hâtun için yevmî yirmişer akçe ve bir hâdimesi için yevmî beşer akçe ki cem‘an gāib-i mezbûr Yusuf Efendi üzerine târih-i kitâbdan beher yevm yirmi beş akçe nafaka farz ve takdîr edip meblağ-ı mefrûz-ı mezbûru kendi ile bir hâdimesine harc ve sarfa ve lede’z-zarûre istidâneye inde’z-zafer zevci gāib-i mezbûr Yusuf Efendi üzerine rücû‘a mezbûre Ayşe Hâtun’a izin vermeğin mâ vaka‘a bi’t-taleb ketb olundu. Fi’l-yevmi’l-âşir min Şevvâli’l-mükerrem li sene seb‘a ve tis‘în ve elf. Şuhûdü’l-hâl: Şaban b. Osman, Ali Çelebi b. Ahmed, Hüseyin Çelebi b. Mustafa, İbrahim Çelebi b. Ahmed, Mahmud b. Hasan.