Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 294 Hüküm no: 455 Orijinal metin no: [89b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal'da ölmüş olan Mitro'nun varislerinden Saltana'nın bir miktar para karşılığında terekedeki hakkından vazgeçtiği Mahrûse-i Üsküdar muzâfâtından Adalar nâhiyesine tâbi‘ Kartal nâm karye mütemekkinlerinden iken bundan akdem mürd olan Mitro v. Panayot nâm hâlikin verâseti sulbiye kızları Saltana ve Melalitana ve li-ebeveyn kız karındaşı Saltana’ya münhasıra olduğu lede’ş-şer‘ mütehakkık oldukdan sonra mersûme Saltana meclis-i şer‘-i şerîf-i lâzımü’t-tevkīrde işbu bâ‘isânü’s-sifr mezbûretân Saltana ve Melalitana muvâcehelerinde ikrâr-ı tâm ve takrîr-i kelâm edip hâlik-i mersûmun verâseti bana ve kızları mersûmetâna münhasıra olup metrûkâtının mâ-bâkīsi şerâit-i sıhhat-i sulhü hâvî tehârüc-i şer‘î tarîkiyle beni yirmi beş guruş üzerine sulh eyledik, ben dahi sulh-ı mezkûru kabûl edip zikr olunan yirmi beş guruşu mezbûretân yedlerinden bi’t-tamâm ahz u kabz edip zimmetlerini hâlik-i mezbûrun cümle metrûkâtından bana âid olan hisse-i şer‘iyeme müte‘allik cemî‘ de‘âvî ve husûmâtdan ibrâ-i âm ile ibrâ ve ıskāt eyledim. Eğer husûs-ı mezkûra müte‘allik benden asâleten ve vekâleten da‘vâ ve taleb zuhûr ederse lede’l-hükkâmi’l-kirâm mesmû‘a ve makbûle olmasın dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Hurrire fi’l-yevmi’l-âşir min-Zilka‘deti’ş-şerîfe li-sene isnâ ve selâsîn ve mi'e ve elf. Şuhûdü’l-hâl: Fahrü’l-eşbâh Halil Ağa b. Mehmed, Mehmed Ağa b. Ahmed serdâr, İsmail Çelebi b. Mehmed, Sofyanos v. Vartalomoz, Sovatyanos v. Vartalomoz, Acı Korteş v. Diyaki Varat v. Kozi, Palalo v. Pelo, Anaştaş v. Yorgaki, Malahat v. Dimitri, Kostantin v. Dimo ve gayruhum.