Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 606 Hüküm no: 748 Orijinal metin no: [133a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Havva bt. Mehmed’in Halil Beşe b. Mehmed’de mehir alacağı olmayıp muhâlaa yoluyla boşandığı Min mümzâtihî Mahmiye-i İstanbul’da Kâtib Muslihiddin mahallesinde sâkin Havva bt. Mehmed nâm hâtun ba‘de’t-ta‘rîfi’ş-şer‘î dîvân-ı kāimmakām-ı hazret-i sadr-ı âlîde ma‘kūd meclis-i şer‘-i şerîf-i enverde sâbıkan zevci olan işbu bâ‘isü’l-kitâb Halil Beşe b. Mehmed mahzarında üzerine da‘vâ ve takrîr-i kelâm edip mezbûr Halil benim zevcim olup târih-i kitâbdan bir sene mukaddem beni bâyinen tatlîk etmekle zimmetinde mütekarrir ve ma‘kūdun-aleyh olan iki bin akçe mehr-i müeccel zimmetinde kalmışdı hâlâ mezbûr Halil Beşe’den suâl olunup meblağ-ı mezbûrun alıverilmesi matlûbumdur dedikde gıbbe’s-suâl mezbûr Halil Beşe cevâbında müdde‘iye-i mezbûre târih-i mezkûrda ber vech-i muharrer taht-ı nikâhımda iken zimmetimde mütekarrir ve ma‘kūdun-aleyh olan meblağ-ı mezbûr iki bin akçe mehr-i müecceli ve nafaka-i iddet-i ma‘lûmesi üzerlerine ve me’ûnet-i süknâsı dahi kendi üzerine olmak üzre benimle muhâla‘a-i sahîha-i şer‘iyye ile muhâla‘a olup ben dahi hul‘-ı mezbûru kabûl etmişdim deyû def‘le mukābele edicek gıbbe’l-istintâk ve’l-inkâr mezbûr Halil Beşe’den def‘-i mezbûruna muvâfık beyyine taleb olundukda mahalle-i mezbûre sükkânından olup zât-ı mezbûreyi şer‘an ârifân Musa b. Mehmed ve İbrahim b. Mustafa nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ işbu müdde‘iye-i merkūme Havva Hâtun târih-i mezbûrda merkūm Halil Beşe’nin taht-ı nikâhında iken zimmetinde mütekarrir olan meblağ-ı mezbûr iki bin akçe mehr-i müecceli ve nafaka-i iddet-i ma‘lûmesi üzerlerine ve me’ûnet-i süknâsı üzerlerine olmak üzre zevci mezbûr Halil Beşe ile bizim huzûrumuzda muhâla‘a-i sahîha-i şer‘iyye ile muhâla‘a olup ol dahi hul‘-ı mezbûru kabûl etmişidi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince müdde‘iye-i mezbûre bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Ahmed Ağa Kethüdâ, Ahmed Beşe Çukadâr, Halil Beşe b. ( ) Buzcu?, Mustafa Ser-muhzırân.