Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 300 Hüküm no: 464 Orijinal metin no: [92a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani'ye ait olan bağı, haksız yere elinde bulunduran Ayşe'nin vermesi gerektiği Medîne-i Üsküdar muzâfâtından olup Adalar nâhiyesine tâbi‘ Yakacık nâm karye sâkinlerinden iken bundan akdem vefât eden Ramazan b. Seydi Abdullah’ın verâseti sulbî kebîr oğlu Hasan ile sulbiye kızı Ümmühani’ye münhasıra oldukda kable’l-kısmet mezbûr Hasan dahi vefât edip verâseti zevcesi Âişe bt. İlyas ile sulbî sagīr oğulları Mehmed ve Hüseyin’e münhasıra oldukda sagīrân-ı mezbûrân Mehmed ve Hüseyin dahi vefât edip verâseti vâlideleri mezbûre Âişe’ye münhasıra oldukda mezbûre Ümmühani tarafından vekîl olup vekâleti zât-ı mezbûreyi ma‘rifet-i şer‘iye ile ârifân olan Hüseyin b. İbrahim ve İsmail b. Mehmed şehâdetleri ile sâbit olan bâ‘isü’l-kitâb Mustafa b. Mehmed nâm kimesne meclis-i şer‘-i şerîf-i enverde mezbûre Âişe tarafından vekîl olup vekâleti zât-ı mezbûreyi ma‘rifet-i şer‘iye ile ârifân olan Ahmed Beşe b. Halil ve Ali Beşe b. Bayram şehâdetleriyle sâbitü’l-vekâle zevci Ahmed Beşe b. Ömer mahzarında üzerine bi’l-vekâle da‘vâ ve takrîr-i kelâm edip müvekkilem mezbûre Ümmühani’nin babası müteveffâ-yı mezbûr Ramazan b. Seydi’nin terekesinden iken hâric-ez defter olup karye-i mezbûre bağları hilâlinde vâki‘ iki tarafı Hanife Beşe mülkü ve bir tarafı Dur Hasan mülkü ve bir tarafı el-Hâc Halil oğlu mülkü ile mahdûd iki yüz guruş kıymetli altı dönüm mülk bağın sülüsü benim mülk-i mevrûsum olup sülüsânı er karındaşım müteveffâ-yı mezbûr Hasan’ın mülk-i mevrûsu olup ol dahi vefât eyledikde zevcesi mezbûre Âişe ile sagīr oğulları mezbûrân Mehmed ve Hüseyin’e isâbet eyledikde mezbûre Âişe kendü tarafından asâleten ve sagīrân-ı mezbûrâna vesâyeten bağ-ı mahdûd-ı mezkûrda olan sülüsân hissesi zevci mezbûr Ahmed Beşe’ye fürûht eyledikde benim sülüs hissemi fuzûlî zabt edip târîh-i kitâba gelince zabt ve tasarruf ve gadr-ı küllî eder suâl olunup bağ-ı mahdûd-ı mezkûrda olan sülüs hissemi mezbûreden alıverilmesi matlûbumdur dedikde gıbbe’s-suâl akībe’l-inkâr müdde‘î-i mezbûrdan müdde‘âsına mutâbık beyyine taleb olundukda udûl-i ahrâr-ı ricâl-i Müslimînden olup karye-i mezbûre sâkinlerinden Mehmed b. el-Hâc Halil ve Ahmed Beşe [b.] Halil ve Hasan Beşe b. Ramazan nâmûn kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka işbu müvekkile-i mezbûrenin müdde‘âsı olup karye-i mezbûrede vâki‘ iki yüz guruş kıymetli bağ-ı mahdûd-ı mezkûr babası müteveffâ-yı merkūm Ramazan b. Seydi’nin terekesindendir, sülüs mezbûre Ümmühani’ye ve sülüsân mezbûr Hasan’a intikāl edip ol vechile bağ-ı mahdûd-ı mezkûrun sülüsü mezbûre Ümmühani’nin mülk-i mevrûsudur, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince bağ-ı mahdûd-ı mezkûrun sülüs hissesini müvekkile-i mezbûre Ümmühani’ye edâ ve teslîme mezbûr Ahmed Beşe ve zevcesi müvekkile-i mezbûre Âişe üzerine ba‘de’l-hükm ve’t-tenbîh birle mâ-vaka‘a bi’t-taleb ketb olundu. Tahrîren fi’l-yevmi’l-âşir min-Recebi’l-ferd sene selâse ve selâsîn ve mi'e ve elf. Şuhûdü’l-hâl: Hasan Çelebi b. Ahmed, İmâm Mehmed Efendi b. Mustafa, Çelebi oğlu Ahmed b. İbrahim, Abdurrahim Çelebi b. Ahmed, Mustafa b. el-Hâc Mehmed, Müezzin Efendi.