Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 301 Hüküm no: 465 Orijinal metin no: [92b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Beşe'nin haksız yere elinde bulundurduğu bahçeyi, sahibi olan İsmail'e teslim etmesi Husûs-ı âti’l-beyânın mahâllinde bâ-fermân-ı âlî ketb ü tahrîrine memûr olduğumuz hasebiyle bu fakīr zeyl-i vesîkada muharrerü’l-esâmî olan kimesneler ile medîne-i Üsküdar muzâfâtından Adalar nâhiyesine tâbi‘ Yakacık nâm karye kurbünde vâki‘ münâza‘ün-fîh olan zikri âtî bağçenin üzerine varılıp akd-i meclis-i şer‘-i şerîf olundukda bağçe-i mezbûra ber-vech-i âtî mülk-i mevrûsunu iddi‘â eden bâ‘isü’l-kitâb İsmail b. Mustafa meclis-i ma‘kūd-ı mezbûrda bağçe-i mezbûreye arazi-yi mîrîye olmak zu‘muyla vâzı‘-ı yed eden Hasan Beşe b. Mehmed mahzarında üzerine da‘vâ ve takrîr-i kelâm edip mûrisimiz olup bundan akdem bilâ-veled vefât eden li-ebeveyn er karındaşım İmâm Süleyman Efendi’nin terekesinden olup Yakacık nâm karye kurbünde vâki‘ olup işbu müşâhede ve mu‘âyene olan câr-ı duvar ile mahsûr olur derûnunda mebnî bir bâb köşk ve bir bi'r-i mâyı ve elli-altmış adedden mütecâviz müsmiresi olan bağçeyi müteveffâ-yı mezbûr İmâm Süleyman Efendi hâl-i hayatında mülk olmak üzere iştirâ ve ile’l-vefât hüccet-i şer‘iye ile zabt ve ba‘dehu bi’l-verâse bizlere intikāl ve mülk-i mevrûsumuz iken mezbûr Hasan Beşe sâhib-i arzdan tapu ile aldım deyü arz-ı mîrî olmak zu‘muyla vaz‘-ı yed edip zabtıma mâni‘ ve gadr-ı küllî eder, suâl olunup yed-i zâlimesi izâle olunup alıverilmesi matlûbumdur dedikde gıbbe’s-suâl mezbûr Hasan Beşe cevâbında kaziyye vech-i meşrûh üzere olup vaz‘-ı yedini ikrâr edip lâkin arz-ı mîrî olmak üzere sâhib-i arzdan ahz ve tefevvüz eyledim, mülk olduğu ma‘lûmum değildir deyü def‘le cevâb vericek müdde‘î-i mezbûrdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden olup Ali Ağa b. Mustafa ve el-Hâc Mustafa b. el-Hâc Mehmed ve el-Hâc Halil b. Mahmud ve Ahmed Beşe b. İvaz ve el-Hâc İsmail b. Mustafa ve sâir bî-garaz kimesne li-ecli’ş-şehâde meclis-i şer‘a hâzırûn olup istişhâd olundukda fi’l-hakīka müdde‘î-i mezbûr İsmail Çelebi b. Mustafa’nın li-ebeveyn er karındaşı olup bundan akdem bilâ-veled vefât eden İmâm Süleyman Efendi’nin terekesinden olup Yakacık nâm karye kurbünde vâki‘ olup işbu müşâhede ve mu‘âyene olan câr-ı duvar ile mahsûr olup derûnunda mebnî bir bâb köşk ve bir bi'r-i mâyı ve elli-altmış adedden mütecâviz eşcâr-ı müsmiresi olan bağçeyi müteveffâ-yı mezbûr Süleyman Efendi hâl-i hayatında mülk olmak üzere iştirâ ve bunca sene zamân zabt ve ile’l-vefât hüccet-i şer‘iye ile tasarruf ve ba‘dehu müdde‘î-i mezbûreye irsen intikāl ve mülk-i mevrûsu olmuşdur ve mezbûr Hasan Beşe’nin vaz‘-ı yed bâtıl ve izâlesi lâzımdır, biz bu husûsa bu vech üzere şâhidleriz ve şehâdet dahi ederiz deyü her birleri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri hayyiz-i kabûlde vâki‘ olmağın mûcebince mezbûr Hasan Beşe bağçe-i mezkûreden kasr-ı yed ve müdde‘î-i mezbûr İsmail Çelebi’ye teslîme ba‘de’l-hükm ve’t-tenbîh birle mâ-vaka‘a bi’t-taleb ketb olundu. Tahrîren fi’l-yevmi’r-râbi‘ min-şehri Şa‘bân sene selâse ve selâsîn ve mi'e ve elf. Şuhûdü’l-hâl: İmâm Mehmed Efendi b. el-Hâc Mustafa, Halil Ağa b. Mehmed, Receb Beşe b. Salih, Monlâ Mustafa b. Ahmed, Halil Beşe b. İbrahim, Mehmed Ağa b. Ahmed, Mehmed Beşe b. Ali, Ahmed Beşe b. Mustafa sâkin-i Üsküdar, el-Hâc Halil b. Mahmud, Ahmed Beşe b. İvaz, Mehmed Beşe b. Şa‘bân, Mehmed b. İbrahim, Mustafa b. Hüseyin, Osman b. Mehmed, İbrahim b. Ahmed, Ömer b. Rasül, Osman b. Ömer, Veli Beşe b. İvaz, Mehmed Beşe b. Ahmed, el-Hâc İsmail Çelebi b. Mustafa, İbrahim b. Mustafa, Seyyid Hasan b. Yusuf, Mustafa b. Ali, Hüseyin Çelebi b. Ahmed, Hasan Beşe b. İbrahim, Mustafa b. Davud, Ahmed b. Hüseyin, Halil b. Hüseyin, Receb b. Mustafa, Hasan Beşe b. el-Hâc Musli, İlyas b. Mehmed, Hüseyin b. Mustafa, Hasan Beşe b. İbrahim ve gayruhum mine’l-hâzırûn.