Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 302 Hüküm no: 466 Orijinal metin no: [92b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gebze'de Orhan Bey Camii Evkafı'na ait olan Kartal iskelesinin gelirlerine engel olunmaması Sûret-i fermân-ı âlîdir Kıdvetü’n-nüvvâbi’l-müteşerri‘în Üsküdar kazâsı muzâfâtından Adalar nâhiyesinde nâibü’ş-şer‘ olan mevlânâ (°) -zîde ilmuhû- tevkī‘-i refî‘-i hümâyûn vâsıl olucak ma‘lûm ola ki, Gekbüze’de vâki‘ merhûm Orhan Bey Câmi‘-i şerîfi Evkāfı karyelerinden nâhiye-i mezbûreye tâbi‘ Kartal nâm karyenin bi’l-fi‘il mültezimi olan kıdvetü’l-emâsil ve’l-akrân Mustafa -zîde kadruhû- südde-i sa‘âdetime arzuhâl edip karye-i mezbûrenin hâsıl tahtında resm-i iskele ve vakfa hâsıl kayd olmağla âharın alâkası olmayıp dahl olunmak îcâb etmez iken hâlâ Kartal’da yasakçı olanlar iskele-i mezbûra gelip giden sefineler ashâbından resm taleb etmekle ashâb-ı sefâyinin iskele-i merkūmeden inkıtâ‘ıyla vakfa âid olan resm-i iskelenin [93a] noksânına bâ‘is [ü] bâdî oldukların bildirip vech-i meşrûh üzere hilâf-ı defter ta‘addîleri vakfa zâhir olan gadrleri men‘ ü def‘ olunmak bâbında emr-i şerîfim ricâ eylediği ecilden Defterhâne-i âmire’mde mahfûz olan defter-i evkāfa mürâca‘at olundukda Gekbüze nâhiyesine tâbi‘ karye-i Kartal Gekbüze’de câmi‘ine vakıfdır, Burhan Bey’de ber-mûceb-i defter-i atîk hâliyâ kemâ-kân mukarrerdir, neferen elli iki ve hâricden gelip zikr olunan karyede mütemekkin olan kâfirler neferen otuz iki ve hâsıl tahtında hınta ve otuz akçe ile iskele yekûn ma‘a gayrihî on bin altı yüz on bir akçe yazı ile mastûr ve mukayyed bulunmağın hilâf-ı Defter-i hâkānî dahl ü ta‘arruz olunmamak emrim olmuşdur, buyurdum ki hükm-i şerîfim vusûl buldukda bu bâbda sâdır olan emrim üzere amel dahi vech-i meşrûh üzere resm defterde vakfa kayd olunup iskele-i mezbûrede yasakçı tâifesinin hilâf-ı Defter-i hâkānî ol vechile ta‘addîleri sebebiyle vakfa zâhir olan gadr ü ta‘addîlerin men‘ u def‘ eyleyip mahsûl-i vakfa bir vechile gadr olunmalu eylemeyesin min-ba‘d Defter-i hâkānîye ve emr-i hümâyûnuma muhâlif kimesneye iş etdirmeyip husûs-ı mezbûr için bir dahi emr-i şerîfim vermeli eylemeyesin, şöyle bilesin, alâmet-i şerîfe i‘timâd kılasın. Tahrîren evâsıtı şehri Rebî‘i’l-âhir sene selâse ve selâsîn ve mi'e ve elf. Kostantıniyye el-mahrûse.