Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 303 Hüküm no: 467 Orijinal metin no: [93a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal yasakçısının kulluklardaki aidatına müdahale edilmemesi İzzetlü ve rif‘atlü Kartal kādısı efendi hazretlerinin huzûr-ı şerîflerine dürer-i tahiyyât-ı sâfiyât ithâfından sonra münhâ-yı muhibbâne ve muhlisâneleridir ki, hâlâ taht-ı hükûmet-şi‘ârınızda vâki‘ kadîmü’l-eyyâmdan Dergâh-ı âlî -dâme mahfûfen bi’l-ma‘âlî- yeniçerilerine postal bahâ ta‘yîn buyurulan kullukdan yasakcısı ref‘ olunup yerine üslûb-ı sâbık üzere Dergâh-ı âlî yeniçerilerinden (°) nâm yoldaş Şa‘bân-ı şerîfin gurresinden kazâ-i mezbûrdan iki değnek verilip yasakçı ta‘yîn ve nasb olunmağın gönderildikde subaşı olan kimesne yedinde yasakçılık ref‘ine fermân-ı âlîşân vardır, iskele umûru umûmen vakfa hâsıl kayd olunmuşdur, zabt etdirmem deyü cevâb eyledikde arz ve i‘lâm eylemen ile arzınız mûcebince Dîvân-ı hümâyûnuma arzuhâl olundukda kemâ fi’l-evvel zabt olunup mu‘tâd-ı kadîm üzere yasakcıya olan âidâtı ahzolunması bâbında fermân-ı celîlü’ş-şân sâdır olmağın mûcebince işbu mektûb tahrîr ve irsâl-i izz-i huzûrları kılındı. Vusûlünde merkūm yoldaşı sâdır olan fermân-ı âlîşân mûcibi üzere yasakçılık umûrunda istihdâm edip âhardan ferd-i vâhidi müdâhale vü mu‘âraza etdirmeyip vâki‘ olan umûr-ı husûsda bi-hasebi’ş-şer‘i’ş-şerîf ve’l-kānûn-ı münîf her vechile imdâd ve i‘ânet edip hilâf-ı şer‘ bir kimesneye rencîde vü remîde etdirmeyesin, bâkī ilm-i şerî‘at dâim bâd. Tahrîren fî-evâili şehri Şa‘bâni’l-mu‘azzam sene selâsîn ve mi'e ve elf. Hasan, Kethüdâ-i Yeniçeriyân-ı Dergâh-ı âlî hâlâ.