Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 304 Hüküm no: 468 Orijinal metin no: [93b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal nahiyesindeki kulluklara subaşının müdahale etmemesi Hüküm mûcebince buyuruldu Devletlü ve sa‘âdetlü sultanım hazretleri sağ olsun Arzuhâl-i kulları budur ki, kānûn-ı kadîm üzere Dergâh-ı âlî yeniçerilerine beher üç ayda bir def‘a tevzî‘ olunmak için postal bahâ ta‘yîn buyurulan kulluklardan Gekbüze muzâfâtından Kartal nâhiyesinde vâki‘ iki deynek ta‘bîr olunur yasakçılık Şa‘bân-ı şerîf gurresi târîhiyle müverrah mektûbuyla (°) nâm yoldaşa verilmişken subaşı olan yedine bir takrîble fermân-ı celîlü’ş-şân alıp kazâ-i mezbûrun min-külli’l-vücûh mahsûlât vakfa hâsıl kayd olunmuşdur deyü zabt etdirmediğinden gayri ol havâlîde olan subaşılar dahi mâ-tekaddemden ta‘yîn buyurulan kulluklara müdâhale etmek sadedinde olmalarıyla huzûr-ı âlîlerine arzuhâl olundu. Merâhim-i aliyyelerinden mercûdur ki, subaşı-yı merkūm mu‘ârazadan men‘ ve mu‘tâd-ı kadîm üzere yeniçeri fukarâları kullarının postal bahâları olan kulluğu mezbûr kemâ fi’l-evvel zabt olunmak bâbında emr-i fermân devletlü merhametlü efendim sultanım hazretlerinindir. Bende: Hasan, Kethüdâ-i Yeniçeriyân.