Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 606 Hüküm no: 749 Orijinal metin no: [133a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Efendi b. İsa’nın vârislerinin Şeyh Abdülkádir-i Geylânî Vakfı’na ait menzilde nöbetleşe oturacakları Mahmiye-i İstanbul’da Hamamcı Muhyiddin mahallesi ahâlîsinden olup Sinop kadısı iken bundan akdem vefât eden Hasan Efendi b. İsâ’nın verâseti zevce-i metrûkesi Fâtıma bt. Mustafa ile evlâd-ı kibârı Hüseyin Efendi ve Abdullah Çelebi ve Mustafa Çelebi ve Tâhir ve kebîre kızı Emine’ye ve sagīre kızı Ümmügülsüm’e münhasıra olduğu şer‘an zâhir ve müte‘ayyin oldukdan sonra mezbûre Ümmügülsüm’ün vâlidesi ve tesviye-i umûru için kıbel-i şer‘den mansûbe vasîsi olan işbu bâ‘isetü’l-kitâb mezbûre Fâtıma meclis-i şer‘de zikri âtî menzile vâzı‘ü’l-yed olan mezbûr Hüseyin Efendi mahzarında takrîr-i kelâm ve Bedevî Şeyh Abdülkādir Geylânî vakfından icâreteyn-i ma‘lûmeteyn ile mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd müteveffâ-yı mezbûrun ile’l-vefât taht-ı tasarrufunda olup ba‘dehû evlâdına intikāl-i âdî ile intikāl eden menzil bi’t-terâzî ifrâz ve her biri hissesinde sâkin olmak bir vech ile mümkün olmamağla muhâyâ lâzım gelmeğin hâlâ menzil-i mezbûrda sâkin olan merkūm Hüseyin Efendi menzil-i mezbûrda târih-i kitâbdan altı ay tamâmına değin sâkin olduğundan sonra altı ay vasîsi olduğumuz sagīre-i mezbûre Ümmügülsüm ve ba‘dehâ mezbûrlardan her biri altışar ay sâkinler olmak üzre beynimizde ittifâk eyledik, husûs-ı mezbûr Hüseyin Efendi’den suâl olunup takrîri tahrîr olunmak matlûbumdur dedikde gıbbe’s-suâl mezbûr Hüseyin Efendi hâl bâlâda tafsîl olunan minvâl üzredir deyû mukırra-i mezbûreyi tasdîk ve tahkīk etmeğin mâ vaka‘a bi’t-taleb ketb olundu. Fi’l-yevmi’l-âşir min Şevvâli’l-mükerrem li sene seb‘a ve tis‘în ve elf. Şuhûdü’l-hâl: Mustafa Çelebi b. Mehmed, Hüseyin Çavuş el-Mübâşir, Şaban Efendi b. Halil, Bostanî Osman Çelebi, Mustafa Çelebi b. el-Hâc Ahmed ve gayruhüm.