Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 304 Hüküm no: 469 Orijinal metin no: [93b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kocaeli'nde kanuna uygun olarak adet-i ağnam vergisinin tahsili Emîrü’l-ümerâi’l-kirâm kebîrü’l-küberâi’l-fihâm zü’l-kadri ve’l-ihtirâm sâhibü’l-izzi ve’l-ihtişâm el-muhtassu bi-mezîdi inâyeti’l-meliki’l-a‘lâ ber-vech-i arpalık Kocaeli sancağına mutasarrıf olan (°) -dâme ikbâluhû- ve mefâhirü’l-kuzât ve’l-hükkâm ma‘âdinü’l-fezâil ve’l-kelâm Kocaeli sancağında kādılar -zîde fazluhû- ve kıdvetü’l-emâcid ve’l-a‘yân mübâşir ta‘yîn olunan -zîde mecdühû- tevkī‘-i refî‘-i hümâyûn vâsıl olucak ma‘lûm ola ki, Anadolu cânibinde olan her sancağın dâhilinde vâki‘ kasaba ve kurâda sâkin ahâlî ve re‘âyânın yedlerinde bulunan koyun ve kuzu ve keçi ve oğlaklarında Rumeli şürûtu üzere îcâb eden âdet-i ağnâmları rüsûmâtı taraf-ı mîrîye tahsîli fermân olup Kocaeli sancağının âdet-i ağnâm tahsîli henüz fermân olmamağla ber-vech-i emânet sâbıkā sârbânbaşı Abdullah’a -zîde mecdühû- tefvîz olunmak fermân olmağın Hazîne-i âmire’[de] mahfûz olan Hâslar Mukāta‘ası defterlerine nazar olundukda Anadolu eyâletinde vâki‘ olan sancakların yüz otuz iki senesi Martı ibtidâsından Teke ve Hamid sancakları misillü sahîhü’n-neseb sâdâd-ı kirâm ve sefer seferli askerinin kendü nefisleri içün besledikleri yüz ellişer re's koyunlarından mâ‘adâsının âdet-i ağnâm ve âdet-i gulâmiye ve resm-i ağılları tahsîl fermân olup livâ-i mezbûrun âdet-i ağnâmı tahsîline henüz fermân olunmadığı derkenâr olunmağla vilâyet-i Anadolu’da vâki‘ Kocaeli sancağının kasaba ve kurâda sâkin sâdâd-ı kirâm sahîh ve sefer seferli askeri tâifesinin kendü nefisleri içün besledikleri yüz ellişer re's koyunlarından mâ‘adâsının ve havâs ve ze‘âmet ve timâr ve evkāf ve mirlivâ ve mîr-i piyâde hâsılları karyelerinin ahâlî ve re‘âyâ yedlerinde bulunan koyun ve kuzu ve keçi ve oğlaklardan her bir re'sinden Rumeli şürûtu üzere birer akçe resm-i ganem ve her yüz re'sde yirmişer akçe âdet-i gulâmiye ve her üç yüz re'sinde beşer akçe resm-i ağılları tahsîl etdirilip ve ze‘âmet ve timâr ve evkāf mutasarrıf olanlarından hâsıl kayd olunmuşdur deyü tasaddî edecekleri nizâ‘ ve iddi‘âlarının ber-taraf olması içün hîn-i tahrîrde kendülere kaçar akçe yazı ile hâsıl kayd olunmuş ise mâl-ı mukāta‘aya mahsûb olmamak vechile iki kat yazıları kalemi mukāta‘adan verilmek üzere şart kılınmağın ve sancak-ı mezbûrun an-vechi’l-kıyem hâsılı ma‘lûm oldukdan sonra mal bağlanıp ba‘dehu mu‘accele ile tâlibine fürûht olunmak için yüz otuz üç senesi Martı ibtidâsından memûr olduğun sancak dâhilinde vâki‘ kasaba ve kurâda ve yaylak ve kışlaklarında bulunan koyun ve kuzu ve keçi ve oğlakların her bir adedine verilen emr-i şerîfim mûcebince resm-i âdet-i ağnâmları cem‘ ü tahsîl ve bir akçesin ketm ü ihtifâ eylemeyip hâsılı ve karyesini ma‘rifet-i şer‘le tahrîr ve defter eyleyip edâ-i sadâkat eylemek üzere Hâslar Kalemi’ne kayd ve şürût-ı sâbıkı üzere emr-i şerîfim verilmek arz ve telhîs olundukda imdi telhîsi mûcebince Hâslar Kalemi’ne kayd olunmağla vech-i meşrûh üzere amel olunmak bâbında fermân-ı âlîşânım sâdır olmuşdur. Buyurdum ki hükm-i şerîfim vardıkda bu bâbda vech-i meşrûh üzere şeref-yâfta-i sudûr olan fermân-ı celîlü’l-kadrimin mazmûn-ı münîfi birle âmil olup hilâfından bir dürlü [94a] vaz‘ u hareketden be-gāyet ihtirâz ve ictinâb eyleyesiz, şöyle bilesiz, alâmet-i şerîfe i‘timâd kılasız. Tahrîren fi’l-yevmi’s-sâmin şehri Cemâziyelâhir sene selâse ve selâsîn ve mi'e ve elf. Kostantıniyye. Vasale ileynâ fî 2 Şevvâl sene 1133 Mûcebince ağa mektûbu dahi tahrîr olunmuşdur ve kayd olunmuşdur.