Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 607 Hüküm no: 750 Orijinal metin no: [133b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Abdullah’ın Hüseyin b. Abdullah’ta olan alacağını kefil İbrahim b. Mehmed’den tahsil etmesi Vilâyet-i Anadolu’da Taşköprü kasabası ahâlîsinden olup mukaddemâ Serdengeçdi ağası olan Mustafa b. Abdullah tarafından husûs-ı âti’l-beyâna vekîl olduğu Mustafa b. Hasan ve İbrahim b. Mehmed şehâdetleriyle şer‘an sâbit olan Hasan b. Hüseyin nâm kimesne meclis-i şer‘-i şerîf-i enverde ba‘isü hâze’l-kitâb İbrahim b. Mehmed mahzarında bi’l-vekâle ikrâr ve takrîr-i kelâm edip müvekkilim mezbûr Mustafa Ağa’nın gāib ani’l-meclis Hüseyin b. Abdullah zimmetinde yedinden müşterâ ve makbûzu iken bir re’s bârgir bahâsından yirmi guruş ve cihet-i karz-ı şer‘îden altı guruş ki cem‘an yirmi altı guruş hakkından işbu yedimde olan hüccet-i şer‘iyye nâtıka olduğu üzre bâkī kalan on altı guruş mezbûr İbrahim tarafından emr ve kabûlü hâviye kefâlet-i sahîha-i şer‘iyye ile kefîl olmağla hâlâ meblağ-ı mezbûr on altı guruş kefâletine binâen mezbûr İbrahim bana edâ ve teslîm ben dahi müvekkilim için bi’t-tamâm yedinden ahz u kabz eyledim ba‘de’l-yevm gāib-i mezbûr Hüseyin ile kefîl-i merkūm üzerlerinde cihet-i mezbûrdan bir akçe ve bir habbe bâkī kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-âşir min Şevvâli’l-mükerrem li sene seb‘a ve tis‘în ve elf. Şuhûdü’l-hâl: Ahmed Beşe b. Abdullah Çukadâr, İbrahim Çelebi b. Ahmed Ser-muhzırân, Hüseyin b. Mustafa Muhzır, Mahmud b. Hasan Muhzır.