Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 608 Hüküm no: 751 Orijinal metin no: [133b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Papa Andon v. Yero’nun bağını bey‘ bi’l-vefâ yoluyla 31. Yeniçeri Ağa Bölüğü Vakfı’na satması Dergâh-ı âlî yeniçerilerinin otuz birinci ağa bölüğüne mahsûs oda mühimmâtı için mevkūfe nukūdun bi’l-fi‘l mütevellîsi olan fahrü’l-eşbâh Mehmed Bey b. Süleyman Paşa tarafından ikrâr-ı câ’i’l-beyânı tasdîke vekîl-i müsecceli Mehmed Hoca b. İbrahim mahzarında medîne-i Galata’ya tâbi‘ Tatavla karyesi sükkânından Papa Andon v. Yero nâm râhib meclis-i şer‘-i şerîf-i enverde ikrâr ve takrîr-i kelâm edip karye-i mezbûre sınırında vâki‘ bir tarafdan Çukacıoğlu Mihalaki bağı ve iki tarafdan tarîk-i âmla mahdûd müsellesü’ş-şekl eşcâr-ı müsmire ve kürûmu ve kuyuyu müştemil bağımı yüz on beş guruşa bey‘ bi’l-vefâ tarîkiyle mütevellî-i merkūma bey‘ ve teslîm ol dahi ber vech-i muharrer iştirâ ve tesellüm ve meblağ-ı mezbûrun yüz guruşunu yedinde olan mâl-ı vakf-ı mezbûrdan bana def‘ ve teslîm ve on beş guruşu için beynimizde ma‘lûm çukayı bana bey‘ ve teslîm ben dahi ahz u kabz ve kabûl ettiğimden sonra târih-i kitâbdan bir sene tamâmına değin deynim olan meblağ-ı mezbûr yüz on beş guruşu mütevellî-i merkūma edâ ve fesh-i akde ta‘ahhüd eyledik dedikde gıbbe’t-tasdîki’l-vicâhî karye-i mezbûre sükkânından Hekim Dimitraki v. Yanaki ve Yorgi İstemadi v. Servi ve terzi Dimitri v. Yanaki nâm zimmîlerden her biri meblağ-ı mezbûr yüz on beş guruşa bi’l-emr ve kabûl kefâlet-i sahîha ile kefîl ve zâmin olmağın mâ vaka‘a bi’t-taleb ketb olundu. Fi’l-yevmi’l-âşir min Şevvâli’l-mükerrem li sene seb‘a ve tis‘în ve elf. Şuhûdü’l-hâl: El-Hâc İbrahim Ağa b. ( ), el-Hâc Mustafa Beşe Mütekā‘id, İbrahim Çelebi b. İshak, Osman Odabaşı.