Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 74 Hüküm no: 3 Orijinal metin no: [1b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa İbrahim Halife’nin oğlu Mustafa’nın vasisi Mehmed Ağa’nın vasilikten azledilip yerine Çinici Mehmed’in tayin edildiği Mahmiye-i İstanbul’da Ereğli mahallesinde sâkin iken bundan akdem vefât eden İbrahim Halîfe b. Abdullah’ın sulbî sagīr oğlu Mustafa’nın tesviye-i umûruna kıbel-i şer‘-i enverden mansûb vasîsi olan Mehmed Ağa b. Mustafa gaybet-i münkatı‘a ile gāib olup hayâtı ve memâtı ma‘lûm olmayıp umûr-ı vesâyet-i mezkûre mu‘attal kalmağın sagīr-i mezbûrun tesviye-i umûruna bir vasî nasbından lâbüd olmağın emânet ve diyânet ile ma‘rûf ve mevsûf olup vesâyet-i mezbûreye her vechile ehil ve mahmûdü’l-hâl olduğu zeyl-i kitâbda isimleri mastûr Müslimîn haberleriyle lede’ş-şer‘i’ş-şerîf zâhir olan mahmiye-i mezbûrede Emin Bey mahallesi ahâlîsinden işbu hâfızü’l-kitâb Çinici el-Hâc Mehmed b. Receb’i hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri gāib-i mezbûr Mehmed Ağa’yı ba‘de’l-azl tesviye-i umûr-ı sagīr-i mezbûra vakt-i rüşd ü sedâdına varınca vasî nasb ü ta‘yîn buyurduklarında ol dahi vesâyet-i mezbûreyi kabûl ve hizmet-i lâzımesini kemâ-yenbağī edâya ta‘ahhüd ve iltizâm etmeğin mâ-hüve’l-vâki‘ bi’t-taleb ketb olundu. Fî 13 Muharremi’l-harâm sene 1110 Şuhûdü’l-hâl: Ahmed Çelebi b. Hasan Efendi, Abdullah Efendi b. Ali el-İmâm, Osman Efendi b. Ömer, Abdülkerim b. Abdurrahim, el-Hâc Hasan b. Hüseyin Müezzin, Mehmed Çelebi b. Mustafa, Hasan Çelebi b. Abdullah.