Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 75 Hüküm no: 4 Orijinal metin no: [1b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdurrahim Çelebi ile oğlu Mustafa’nın varislerinden Fatıma Hatun’un miras hissesini diğer varis Hatice Hatun’dan tamamen teslim alıp zimmetini ibra ettiği Husûs-ı âti’l-beyânın mahallinde ketb ü tahrîri içün bi’l-iltimâs kıbel-i şer‘den me’zûnen Mevlânâ Uşşâkī Mehmed Efendi irsâl olunup ol dahi mahmiye-i İstanbul’da Altıbohça mahallesinde sâkin iken bundan akdem vefât eden Abdurrahim Çelebi b. el-Hâc Sefer’in menziline varıp zeyl-i vesîkada mastûrü’l-esâmî Müslimîn huzûrlarında akd-i meclis-i şer‘-i mübîn eyledikde müteveffâ-yı mezbûrun verâseti zevce-i menkûha-i metrûkesi Fâtıma bt. Ebubekir ile vâlidesi Hadîce Hatun bt. Ali’ye ve sagīr oğlu Mustafa’ya münhasıra olup ba‘de’l-kısme sagīr-i mezbûr Mustafa dahi fevt verâseti vâlidesi mezbûre Fâtıma’ya münhasıra ve tashîh- meselesi yirmi dört sehmden olmağla sihâm-ı mezbûrenin dört sehmi mezbûre Hadîce’ye ve bâkī yirmi sehmi mezbûre Fâtıma’ya isâbeti tahakkukundan sonra zâtı Bekir Çelebi b. el-Hâc Bayezid ve Sinan Efendi b. Ali ta‘rîfleriyle mu‘arrefe olan mezbûre Fâtıma meclis-i ma‘kūd-ı mezbûrda sagīr-i mezbûrun hayâtında vasiye-i mansûbesi olmağla hissesine vaz‘-ı yed eden bâ‘isetü’l-kitâb mezbûre Hadîce Hatun mahzarında bi-tav‘ihâ ikrâr ve takrîr-i kelâm edip zevcim müteveffâ-yı mezbûrun terekesi tahrîr ve ba‘de ihrâci’l-mesârif ve’d-düyûn para üç hesâbı üzere bâkī kalan meblağdan ve ba‘dehû fevt olan oğlum sagīr-i mezbûrdan tashîh-i merkūm üzere bana isâbet eden kırk altı bin sekiz yüz seksen akçenin yüz elli guruşunu Salih Çelebi’den kabûl ve bâkīsini mezbûre Hadîce yedinden tamâmen ahz u kabz edip min-ba‘d meblağ-ı merkūmdan yedinde ve zimmetinde bir akçe ve bir habbe hakkım bâkī kalmayıp zevcim müteveffâ-yı mezbûrun ve oğlum sagīr-i mezbûrun terekelerinden hisseme isâbet eden mîrâs da‘vâsından mezbûre Hadîce’nin zimmetini ibrâ ve iskāt eyledim ol dahi hissesine müte‘allıka âmme-i mîrâs da‘vâsından benim zimmetimi ibrâ ve iskāt eyledi dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an ba‘s olunan İbrahim b. Mehmed ile meclis-i şer‘a [gelip] alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fî 16 min-Muharremi’l-harâm li-sene aşer ve mi’e ve elf. Şuhûdü’l-hâl: Sinan Efendi b. Ali el-İmâm, el-Hâc Ömer b. Ahmed, Salih Çelebi b. el-Hâc Mustafa, Ebubekir Efendi b. el-Hâc Mustafa, İsmail Çelebi b. el-Hâc Mustafa, Molla Ali b. Fethullah, Bekir Beşe b. el-Hâc Bayezid, Hasan Beşe b. Mehmed, İbrahim Beşe b. Mehmed ve gayruhum.