Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 76 Hüküm no: 5 Orijinal metin no: [2a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Çukadar Hasan Beşe’nin Müezzin Yusuf’un para vakfından aldığı borcun terekesinden ödenmesi Husûs-ı âti’l-beyânın mahallinde istimâ‘ ve tahrîri içün bi’l-iltimâs savb-ı şer‘den me’zûnen Mevlânâ Uşşâkī Mehmed Efendi irsâl olunup ol dahi mahmiye-i İstanbul’da Bezzâzistân-ı atîk kurbünde Çukacı el-Hâc Osman’ın mahzenine varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i hatîr eyledikde mahmiye-i mezbûrede Hoşkadem mahallesinde sâkin iken bundan akdem vefât eden Müezzin el-Hâc Yusuf Efendi’nin âşûr[e] içün vakfeylediği nukūd-ı mevkūfeye bi’l-fi‘il mütevellî olan bâ‘isü’l-kitâb Müezzin Hüseyin Efendi b. Abdulkadir meclis-i ma‘kūd-ı mezbûrda mahmiye-i mezbûrede Hacı Ferhad mahallesinde sâkin iken bundan esbak vefât eden Çukadâr Hasan Beşe b. İsa b. Muslu’nun tesviye-i umûruna vasiyy-i muhtârı olmağla terekesine vaz‘-ı yed eden Kethüdâ Osman Ağa b. Ömer mahzarında üzerine da‘vâ ve takrîr-i kelâm edip müteveffâ-yı mezbûr Çukadâr Hasan Beşe b. İsa b. Muslu’ya bin yüz sekiz senesinden Zilhiccesi gurresine mütevellî olduğum mal-ı vakf-ı mezbûrdan otuz dört buçuk guruş idâne ve teslîm ol dahi istidâne ve kabz ve [mukābelesinde] işbu bir sîm kılıç ve bir sîm hıştını rehin vaz‘ ü teslîm edip işbu mu‘anven mersûm deyn temessüğünü vermişidi meblağ-ı merkūmu kable’l-edâ ve’l-fek fevt olmağla terekesinden taleb ederim suâl olunsun dedikde gıbbe’s-suâl vasiyy-i mezbûr cevâbında tereke-i müteveffâ-yı mezbûra vech-i muharrer üzere vaz‘-ı yedini ikrâr ve deyn-i mezkûru inkâr edicek müdde‘î-i mezbûrdan müdde‘âsına beyyine taleb olundukda udûl-ı ahrâr-ı ricâl-i Müslimînden zikr olunan Hoşkadem mahallesinde sâkin Ali Efendi b. Mehmed ve Kalenderhane mahallesinde sâkin Osman Efendi b. Mehmed li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Çukadâr Hasan Beşe b. İsa b. Muslu târîh-i merkūmda işbu müdde‘î-i mezbûr yedinden mütevellî olduğu vakf-ı mezbûr malından huzûrumuzda otuz dört buçuk guruş istidâne ve kabz ve mukābelesinde işbu bir sîm kılıç ve bir hıştı rehin vaz‘ ü teslîm eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm vâki‘ hâli mevlânâ-yı mezbûr mahallinde tahrîr ve ba‘dehû ma‘an ba‘s olunan Hasan b. Abdullah ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fî 17 min-Muharrem sene 1110 Şuhûdü’l-hâl: Fahrü’l-müderrisîn Mehmed Efendi b. Ahmed, İsmail Çelebi b. Abdullah, el-Hâc Osman Ağa b. Abdullah, Hüseyin b. Mustafa, Selim Çelebi b. Abdullah, Osman Ağa b. Ali.