Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 77 Hüküm no: 6 Orijinal metin no: [2a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Çukadar Hasan Beşe’nin Müezzin Yusuf’un para vakfından aldığı borca karşılık rehin verdiği kılıç ve hıştın vasisine iadesi Kezâlik Çukacı el-Hâc Osman’ın mahzenine varıp akd-i meclis-i şer‘-i şerîf ettikde hâlâ Mısır kādısı olan fazîletlü Ahmed Efendi hazretlerinin kethüdâları bâ‘isü’l-kitâb Osman Ağa b. Ömer meclis-i ma‘kūd-ı mezbûrda müşârün-ileyh Ahmed Efendi’nin çukadârı olup mahmiye-i mezbûrede Hacı Ferhad mahallesinde sâkin iken bundan akdem vefât eden Hasan Beşe b. İsa b. Muslu’nun tesviye-i umûruna li-ecli’d-da‘vâ vasî nasb olunan mezbûr el-Hâc Osman mahzarında üzerine da‘vâ ve takrîr-i kelâm edip müteveffâ-yı mezbûr Hasan Beşe b. İsa b. Muslu hayâtında yedimde mülk ve hakkım olan işbu bir hışt ve bir sîm kılıcı merhûm el-Hâc Yusuf Efendi’nin nukūd-ı mevkūfesinden mütevellîsi işbu hâzır bi’l-meclis Hüseyin Efendi yedinden istidâne ve kabz eylediği otuz dört buçuk guruş mukābelesinde benim iznimle rehin vaz‘ ü teslîm edip kable’l-edâ fevt olmağla meblağ-ı merkūm terekesinden edâ ve fekk-i rehn olunduktan sonra zikr olunan kılıç ve hıştı taleb eylediğimde vasiyy-i merkūm bana teslîmden imtinâ‘ eder suâl olunsun dedikde gıbbe’s-suâl vasiyy-i mezbûr cevâbında mârrü’z-zikr kılıç ve hışta tereke-i müteveffâ-yı mezbûrdan olmak üzere vaz‘-ı yedini ikrâr ve müdde‘î-i mezbûrun müdde‘âsını inkâr edicek müdde‘î-i mezbûrdan müdde‘âsına beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Kalenderhane mahallesinde sâkin Osman Efendi b. Mehmed ve Murad Paşa mahallesinde sâkin el-Hâc Hüseyin b. Ali ve Mehmed Efendi b. Ahmed li-ecli’ş-şehâde meclis-i ma‘kūd-ı mezbûra hâzırûn olup isre’l-istişhâd fi’l-hakīka işbu bir sîm kılıç ve bir sîm hışt müdde‘î-i mezbûrun mülk ve hakkıdır müteveffâ-yı mezbûr Hasan Beşe b. İsa b. Muslu istidâne eylediği meblağ-ı merkūm mukābelesinde mütevellî-i mezbûr yedine müdde‘î-i mezbûrun izniyle rehin vaz‘ ve teslîm eylemişdir zikr olunan kılıç ve hışt müdde‘î-i mezbûrun mülkü olduğuna biz şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ [hâli] mevlânâ-yı mezbûr zikr olunduğu üzere i‘lâm etmeğin mâ-vaka‘a kayd-şüd Fî 16 min-Muharrem sene 1110 Şuhûdü’l-hâl: Eyüb Ağa b. Ramazan, Ahmed Çelebi b. Ali, el-Hâc Osman Ağa b. Ali, el-Hâc Osman b. Abdullah, Şahin Çelebi b. Abdullah, Selim Çelebi b. Abdullah.