Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 608 Hüküm no: 752 Orijinal metin no: [133b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rabia Hatun bt. Nuh’un menzilini Salih Çelebi b. Abdullah’a satması Mahmiye-i İstanbul’da Kirmasti mahallesi sâkinelerinden umdetü’l-muhadderât Râbia Hâtun bt. Nuh Efendi tarafından husûs-ı âti’l-beyâna vekîl olduğu zâtı ma‘rifet-i şer‘iyye ile ârifân Ali Beşe b. Mehmed ve İbrahim Halîfe b. Halil nâm kimesneler şehâdetleriyle şer‘an vekâleti sâbite olan Hamza Efendi b. Mustafa meclis-i şer‘-i şerîf-i enverde işbu sâhib-i hâze’l-kitâb Sâlih Çelebi b. Abdullah mahzarında bi’l-vekâle ikrâr-ı tâm ve takrîr-i kelâm edip müvekkilem mezbûr Râbia’nın akd-i âtî sudûruna değin silk-i mülkünde münselik olup mahmiye-i mezbûrede Molla Hüsrev mahallesinde vâki‘ bir tarafdan Seremci? Hasan Efendi vakfı olan odaların fevkānî ve bir tarafdan su kemeri ve bir tarafdan yine mezbûre Râbia Hâtun vakfından olup mezbûr Sâlih Çelebi tasarrufunda olan menzil ve bir tarafdan ba‘zan mezbûrenin vakfından Ali Çelebi taht-ı tasarrufunda olan menzil ve ba‘zan tarîk-i hâs ile mahdûd bir bâb oda ve altında kârgîr mahzeni ve bir mikdâr havluyu müştemil mülk menzilini bi cümleti’t-tevâbi‘ ve’l-levâhık ve kâffeti’l-hukūk ve’l-merâfık iki yüz yetmiş beş kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘iyye ile mezbûr Sâlih Çelebi’ye bey‘ ve teslîm ol dahi minvâl-i muharrer üzre iştirâ ve tesellüm ve kabûl ettikden sonra semeni olan meblağ-ı mezbûr iki yüz yetmiş beş guruşu mezkûr Sâlih Çelebi yedinden bi’t-tamâm ve’l-kemâl ahz u kabz eyledim ba‘de’l-yevm menzil-i mahdûd-ı mezkûr mezbûr Sâlih Çelebi’nin mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min Şevvâli’l-mükerrem li sene seb‘a ve tis‘în ve elf. Şuhûdü’l-hâl: Çukadâr Ahmed Beşe b. Abdullah, Şâhin b. Abdullah tâbi‘-i mezbûr, Mehmed b. Abdullah Muhzır.