Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 78 Hüküm no: 7 Orijinal metin no: [2a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un vefat eden kocası Şirvanîzade Mustafa Efendi’de olan mehir alacağını terekesinden teslim aldığı Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘-i enverden me’zûnen irsâl olunan Mevlânâ Mukayyid Mustafa Efendi b. Mehmed mahmiye-i İstanbul’da Molla Şeref mahallesi ahâlîsinden olup Dimyat kazâsından ma‘zûlen gelirken Bulak nâm kasabada vefât eden Şirvanîzâde Mustafa Efendi b. Ahmed b. Mehmed’in menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun zevce-i menkûha-i metrûkesi olup zâtı ta‘rîf-i şer‘î ile mu‘arrefe olan hâfızatü’l-kitâb Fâtıma Hatun bt. Ahmed Efendi meclis-i ma‘kūd-ı mezkûrda müteveffâ-yı mezbûrun li-ebeveyn hâli kızı ve vârisesi olup Tevkī‘î Cafer Çelebi mahallesinde sâkine Hadîce Hatun bt. Sahhâf Mehmed Efendi b. Hâfız Abdullah Efendi tarafından husûs-ı âti’l-beyânda vekîl [müseccel-i] olduğu zât-ı mezbûreyi ma‘rifeti şer‘iyye ile ârifân zikr olunan Tevkī‘î Cafer Çelebi mahallesinde sâkin Mustafa Efendi b. Hüsameddin ve Hüseyin Çelebi b. Mehmed şehâdetleriyle mahzar-ı hasm-ı câhidde sâbit ve sübût-ı vekâletine hükmolunmağla terekesine vaz‘-ı yed eden Abdi Ağa b. Mehmed Ağa muvâcehesinde üzerine da‘vâ ve takrîr-i kelâm edip zevcim müteveffâ-yı mezbûr Şirvanîzâde Mustafa Efendi b. Ahmed b. Mehmed târîh-i fevtinden beş sene mukaddem mahrûse-i Edirne’de [2b] tezevvüc murâd ettikde huzûr-ı Müslimînde beş yüz guruş mehr-i müeccel tesmiyesiyle beni tezevvüc ve kabûl edip hattâ hâl-i kemâl-i sıhhatinde zikr olunan beş yüz guruş mehr-i müeccel zimmetinde bana deyni olduğunu huzûr-ı Müslimînde ikrâr ve işhâd edip akd-i nikâh beynimizde kāim iken meblağ-ı mezbûru kable’l-edâ fevt olmağla mezbûr Abdi Ağa’dan taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûreden sıdk-ı makāline beyyine taleb olundukda udûl-ı ahrâr-ı ricâl-i Müslimînden zikr olunan Molla Şeref mahallesinde sâkin fahrü’l-müderrisîni’l-kirâm li-ebeveyn karındaşı Feyzullah Efendi b. Ahmed Efendi ve mefharü’l-kuzât Ali Efendi b. Süleyman ve Mahmud Efendi b. el-Hâc Ömer li-ecli’ş-şehâde meclis-i ma‘kūd-ı mezkûrda hâzırûn olup istişhâd olunduklarında fi’l-hakīka müteveffâ-yı mezbûr Şirvanîzâde Mustafa Efendi b. Ahmed b. Mehmed hâl-i kemâl-i sıhhatinde zevcesi işbu müdde‘iye-i mezbûre Fâtıma Hatun’a zimmetimde beş yüz guruş mehr-i müeccel deynim vardır deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın müdde‘iye-i mûmâ-ileyhâ Fâtıma Hatun zikr olunan beş yüz guruşu zevci müteveffâ-yı mezbûrdan alıp kabz eylemeyip veyâ hîbe veyâ âhara havâle veyâ turuk-ı şer‘iyyeden bir tarîk ile müteveffâ-yı mezbûrun zimmetini ibrâ eylemediğine mûmâ-ileyhâ Fâtıma Hatun’a yemîn teklîf olundukda ol dahi alâ-vefki’l-mesûl yemîn billâhi’l-aliyyi’l-a‘lâ etmeğin mûcebince müdde‘iye-i mûmâ-ileyhâ Fâtıma Hatun meclis-i ma‘kūd-ı mezkûrda vekîl-i merkūm Abdi Ağa mahzarında ikrâr ve takrîr-i kelâm edip zikr olunan beş yüz guruş mehr-i müeccel hakkımı Mısır kassâm defteri mûcebince Mısır’da olan terekesinden ahz u kabz eyledim meblağ-ı mezbûrdan zevcim müteveffâ-yı mezbûr zimmetinde bir şey kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an ba‘s olunan Mehmed Efendi b. Sunullah ve el-Hâc Dilaver b. Abdullah ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fî 10 min-Muharrem sene 1110 Şuhûdü’l-hâl: Ali Bey b. Süleyman, Osman Bey b. Ali, Salih Çelebi b. Ahmed, Mustafa Çelebi b. Mehmed, Ali Ağa b. el-Hâc Mustafa.