Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 79 Hüküm no: 8 Orijinal metin no: [2b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şirvanîzade Mustafa Efendi’nin varislerinden Hatice Hatun’un alacak iddiasıyla diğer varis Fatıma Hatun’a açtığı davada haksız bulunduğu Kezâlik akd-i meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkesi umdetü’l-muhadderât Fâtıma Hatun bt. el-müvellâ el-merhûm el-mağfûrun-leh Ahmed Efendi’ye ve li-ebeveyn hâli kızı olup mahmiye-i mezbûrede Tevkī‘î Cafer Çelebi mahallesinde sâkine Hadîce Hatun bt. Sahhâf Mehmed Efendi b. Hâfız Abdullah Efendi’ye münhasıra ve tashîh-i meselesi dört sehmden olmağla sihâm-ı mezbûrenin bir sehmi mûmâ-ileyhâ Fâtıma Hatun’a ve üç sehmi mezbûre Hadîce’ye isâbet ettikden sonra mezbûre Hadîce Hatun bt. Sahhâf Mehmed Efendi b. Hâfız Abdullah Efendi tarafından husûs-ı âti’l-beyânda vekîl olduğu zât-ı mezbûreyi ma‘rifet-i şer‘iyye ile ârifân zikr olunan Tevkī‘î Cafer Çelebi mahallesinde sâkin Mustafa Efendi b. Hüsameddin ve Hüseyin Çelebi b. Mehmed şehâdetleri ile mahzar-ı hasm-ı câhidde sâbit ve sübût-ı vekâletine hükmolunan mârrü’z-zikr Tevkī‘î Cafer Çelebi mahallesinde sâkin Abdi Ağa b. Mehmed Ağa meclis-i ma‘kūd-ı mezbûrda zâtı ta‘rîf-i şer‘î ile mu‘arrefe olan hâfızatü’l-kitâb mûmâ-ileyhâ Fâtıma Hatun bt. el-merhûmü’l-mezbûr Ahmed Efendi mahzarında bi’l-vekâle üzerine da‘vâ ve takrîr-i kelâm edip mûmâ-ileyhâ Fâtıma Hatun zevci müteveffâ-yı mezbûr Şirvanîzâde Mustafa Efendi ile târîh-i fevtinden beş sene mukaddem mahrûse-i Edirne’de merkūm Mustafa Efendi <> mülâzemetde iken mûmâ-ileyhâ Fâtıma Hatun mahrûse-i mezbûrede Kavukçuzâde Abdullah Efendi b. İbrahim’den iki yüz elli guruş iktirâz ve kabz edip meblağ-ı mezkûru merkūm Şirvanîzâde Mustafa Efendi mûmâ-ileyhâ Fâtıma Hatun’un izniyle mezbûr Kavukçuzâde Abdullah Efendi b. İbrahim’e kendi malından edâ ve teslîm etmekle meblağ-ı merkūmdan tashîh-i mezbûr üzere müvekkileme isâbet eden yüz seksen yedi buçuk guruş ile müteveffâ-yı mezbûrun terekesinden işbu yemenî zarflı elli guruş kıymetli altın akreb sâ‘atden ve balgamî kabzalı yirmi guruş kıymetli altın zarflı bıçakdan ve on guruş kıymetli bir serâser yorgandan tashîh-i mezbûr üzere müvekkileme isâbet eden altmış guruşu dahi mûmâ-ileyhâ Fâtıma Hatun’dan taleb ederim suâl olunsun dedikde gıbbe’s-suâl mûmâ-ileyhâ Fâtıma Hatun cevâbında zevcim müteveffâ-yı mezbûrun kendi malından Kavukçuzâde Abdullah Efendi b. İbrahim’e edâ eylediği iki yüz elli guruşu mukaddemâ benden zevcim mezbûr Mustafa Efendi tamâmen alıp ve mesârifine sarfla istihlâk edip hattâ kemâl-i sıhhatinde huzûr-ı Müslimînde meblağ-ı merkūmu benden tamâmen alıp kabz etmekle zimmetimin berî olduğunu ve zikr olunan sâ‘at ve bıçağını dahi hâl-i kemâl-i sıhhatinde bana hîbe-i tâmme ile hîbe ve teslîm ve benim dahi ittihâb ve kabz ettiğimi ve zikr olunan yorgan benim mülküm ve hakkım olup alâka ve medhali olmadığını huzûr-ı Müslimînde ikrâr ve işhâd etmişdir deyü def‘le mukābele ve istintâk olunsun dedikde gıbbe’l-istintâk ve’l-inkâr mûmâ-ileyhâ Fâtıma Hatun’dan def‘-i meşrûhuna beyyine taleb olundukda udûl-ı ahrâr-ı ricâl-i Müslimînden zikr olunan Molla Şeref mahallesinde sâkin mezbûre Fâtıma [Ha]tun’un li-ebeveyn karındaşı fahrü’l-müderrisîni’l-kirâmi’l-merhûmi’l-mezbûr Ahmed Efendi ve mefharü’l-kuzât Ali Efendi b. Süleyman ve Mahmud Efendi b. Hacı Ömer ve Ahmed b. Ömer li-ecli’ş-şehâde meclis-i ma‘kūd-ı mezbûra hâzırûn olup isre’l-istişhâd fi’l-hakīka müteveffâ-yı mezbûr Şirvanîzâde Mustafa Efendi b. Ahmed b. Mehmed hâl-i kemâl-i sıhhatinde Kavukçuzâde Abdullah Efendi b. İbrahim’e malından kazâ eylediğim meblağ-ı merkūm iki yüz elli guruşu zevcesi işbu mûmâ-ileyhâ Fâtıma Hatun yedinden mukaddemâ tamâmen alıp mesârifime sarfla istihlâk etmekle meblağ-ı mezbûrdan mûmâ-ileyhâ Fâtıma Hatun’un zimmetinin berî olduğunu ve zikr olunan sâ‘at ve bıçağını hâl-i kemâl-i sıhhatinde işbu zevcesi mûmâ-ileyhâ Fâtıma Hatun’a hîbe ve teslîm ol dahi ittihâ[b] ve kabûl eylediğini ve zikr olunan yorgan mûmâ-ileyhâ Fâtıma Hatun’un mülk ve hakkı olup kendinin alâka ve medhali olmadığını huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm mezbûr Abdi Ağa husûs-ı mezkûra müte‘allık mûmâ-ileyhâ Fâtıma Hatun ile mu‘ârazadan men‘ eylediğini mevlânâ-yı mezbûr mahallinde tahrîr ba‘dehû ma‘an ba‘s olunan ile i‘lâm etmeğin mâ-vaka‘a kayd-şüd. Fi’t-târîhi’l-mezbûre li-seneti’l-mezbûr Şuhûdü’l-hâl: Es-sâbikūn es-sâbikūn.