Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 80 Hüküm no: 9 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun’un mirasçılarının terekedeki hisselerini varis Ahmed’den alıp zimmetini ibra ettikleri Husûs-ı âti’l-beyânın mahallinde ketb ü tahrîri’çün bi’l-iltimâs cânib-i şer‘-i enverden Mevlânâ Mehmed Efendi b. Mahmud irsâl olunup ol dahi mahmiye-i İstanbul’da Haraccı Kara Mehmed mahallesinde el-Hâc Süleyman b. Yusuf’un menziline varıp zeyl-i kitâbda isimleri mastûr Müslimîn huzûrlarında akd-i meclis-i şer‘-i şerîf ettikde mahalle-i mezbûrede sâkine iken bundan akdem vefât eden Emine Hatun bt. el-Hâc Hasan’ın verâseti zevc-i metrûku Ahmed Çelebi b. Resul ile vâlidesi Fâtıma Hatun bt. Derviş’e ve sadriye sagīre kızı Ümmühani ile li-ebeveyn er karındaşı el-Hâc Ahmed’e ve kız karındaşları Âişe ve Hadîce’ye münhasıra ve tashîh-i meselesi kırk sekiz sehmden olmağla sihâm-ı mezbûrenin on iki sehmi zevci mezbûr Ahmed Çelebi’ye ve sekiz sehmi vâlidesi mezbûre Fâtıma Hatun’a ve yirmi dört sehmi kızı sagīre-i mezbûre Ümmühani’ye ve bâkī dört sehmden iki sehmi mezbûr el-Hâc Ahmed’e ve birer sehmi mezbûretân Âişe ve Hadîce’den her birine isâbeti tahakkukundan sonra mezbûr el-Hâc Ahmed asâleten ve zâtları merkūm el-Hâc Süleyman ile el-Hâc Mustafa b. Himmet ta‘rîfleriyle mu‘arrefe olan mezbûrât Fâtıma ve Hadîce ve Âişe’den her biri dahi asâleten meclis-i ma‘kūd-ı mezbûrda tereke-i müteveffât-ı mezbûreye bi’l-verâse vaz‘-ı yed eden hâfızü’l-kitâb mezbûr Ahmed Çelebi mahzarında her biri ikrâr ve takrîr-i kelâm edip mûrisemiz müteveffât-ı mezbûrenin terekesi tahrîr ü takvîm ve ber-mûceb-i defter-i kassâm-ı askerî tashîh-i mezbûr üzere bize isâbet eden on üç bin yüz doksan sağ akçeyi terekeden olmak üzere merkūm Ahmed Çelebi yedinden bi-kadri’l-hısâs tamâmen ahz u kabz eyledik ba‘de’l-yevm ber-mûceb-i defter-i mezbûr ve hâric ez defter tereke-i müteveffât-ı mezbûreden tashîh-i mezbûr üzere hissemize isâbet eden mîrâs da‘vâsından merkūm Ahmed Çelebi’nin zimmetini ibrâ-i âm ve kâtı‘u’n-nizâ‘la ibrâ ve iskāt eyledik dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâlînde tahrîr ve ma‘an ba‘s olunan Mehmed b. Ahmed ile meclis-i şer‘a gelip alâ-vukū‘ihi inhâ etmeğin mâ-vaka‘a kayd-şüd Fî 13 min-Muharrem sene 1110 Şuhûdü’l-hâl: Yusuf Çelebi b. Cafer, Nalband Usta Hasan b. Receb, İsmail b. Himmet, Nalband Usta Dilaver b. Abdullah, Hüseyin Beşe b. Receb, Hasan Beşe b. Abdullah.