Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 85 Hüküm no: 14 Orijinal metin no: [4a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un oğlu Ahmed’e günlük dört akçe nafaka takdir edildiği Mahmiye-i İstanbul’da Yenibahçe kurbünde Mimârsinan mahallesinde sâkine iken bundan akdem vefât eden Fâtıma bt. Abdullah’ın sadrî sagīr oğlu Ahmed b. Mehmed’in kıbel-i şer‘den mansûb vasîsi olan râfi‘ü hâze’l-kitâb Osman Beşe b. Abdullah meclis-i şer‘de <> takrîr-i kelâm edip vasîsi olduğum sagīr-i mezbûrun vâlidesi müteveffât-ı mezbûreden irs-i şer‘le kendüye intikāl eden malından nafaka ve kisve-bahâ ve sâir [4b] mesârif-i lâzımesi’çün kıbel-i şer‘den kadr-ı kifâye nafaka farz ve takdîr olunmak matlûbumdur dedikde taraf-ı şer‘den vech-i meşrûh üzere sagīr-i mezbûra vâlidesi müteveffât-ı mezbûreden irs-i şer‘le kendüye intikāl eden malından nafaka ve kisve-bahâ ve sâir mesârif-i lâzımesi’çün târîh-i kitâbdan yevmî dörder sağ akçe nafaka farz ve takdîr olunup inde’l-ihtiyâc istidâneye ve vakt-i zaferde istircâ‘a taraf-ı şer‘den izin verilmeğin kayd-şüd. Fî 14 Muharrem sene 1110 Şuhûdü’l-hâl: Abdurrahim b. Mehmed Efendi, Solak Eyüb Ağa b. Mehmed, Mehmed Sadık Efendi b. Salih, Abdullah Çelebi b. Hasan, Kara Mehmed b. Hüseyin.