Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 86 Hüküm no: 15 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Nalıncıoğlu Attar Mustafa’nın Salomon’a olan borcunun terekesinden ödenmesi Husûs-ı âti’l-beyânın mahallinde ketb ü tahrîr ve istimâ‘ı iltimâs olunmağın savb-ı şer‘den me’zûnen irsâl olunan Mevlânâ Ahmed Efendi b. el-merhûm İsmail Efendi mahmiye-i İstanbul’da Yeni Câmi‘ kurbünde vâki‘ Attârlar sûkunda İbrahim Çelebi b. Mustafa’nın menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf eyledikde Kasdorya cemâ‘atinden olup mahrûse-i Galata’da Çavuşbaşı mahallesinde sâkin bâ‘isü’s-sifr Dellâllar Salomon v. İsak nâm Yahûdi meclis-i ma‘kūd-ı mezbûrda mahmiye-i mezbûrede el-Hâc Hasan mahallesinde sâkin iken bundan akdem vefât eden Na‘lıncıoğlu Attâr el-Hâc Mustafa b. Mahmud b. Hasan’ın evlâd-ı sıgārı Âişe ve Emine ve Safiye’nin tesviye-i emrlerine vasiyy-i mansûbu olmağla tereke-i müteveffâ-yı mezbûra vaz‘-ı [yed] eden Attâr İbrahim Çelebi b. Mustafa mahzarında üzerine da‘vâ ve takrîr-i kelâm edip müteveffâ-yı mezbûr Attâr el-Hâc Mustafa b. Mahmud b. Hasan zimmetinde vezn ve kıymetleri beynimizde ilm-i şer‘î ile ma‘lûm yedimden müşterâ ve makbûz beş sandık toz şeker bahâsından ba‘de külli’l-hesâb yedi yüz on sekiz guruş ve on sekiz akçe hakkım olup hattâ müteveffâ-yı mezbûr el-Hâc Mustafa hayâtında fevtinden on üç gün mukaddem meblağ-ı mezbûr yedi yüz on sekiz guruş ve on sekiz akçe zimmetimde bana cihet-i mezbûreden vâcibü’l-edâ deyni olduğunu huzûr-ı Müslimînde ikrâr ve işhâd edip meblağ-ı mezbûru kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mesfûrdan müdde‘âsına beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Sahhâf Süleyman mahallesinde sâkin Attârlar kethüdâsı el-Hâc Mehmed b. Mustafa ve İbrahimpaşa mahallesinde sâkin Attâr Ali Çelebi b. Abdullah ve Hazret-i Eyüb’de Kiremitçi Süleyman mahallesinde sâkin Mustafa Çelebi b. Mehmed li-ecli’ş-şehâde meclis-i ma‘kūd-ı mezbûra hâzırûn olup isre’l-istişhâd fi’l-hakīka müteveffâ-yı mezbûr hayâtında fevtinden on üç gün [mukaddem] meblağ-ı mezbûr yedi yüz on sekiz guruş ve on sekiz akçe cihet-i mezbûreden zimmetinde müdde‘î-i mesfûr Salomon v. İsak Yahûdiye vâcibü’l-edâ deyni olduğunu huzûrumuzda ikrâr ve bizi işhâd eyledi şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a kayd-şüd Fî 15 Muharrem sene 1110 Şuhûdü’l-hâl: Ömer Ağa b. Hüsam, Osman Ağa b. Mehmed, el-Hâc Ali b. Ahmed, Mustafa Çelebi [b.] Abdullah, el-Hâc Osman.