Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 87 Hüküm no: 16 Orijinal metin no: [4b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin’in varislerinin miras haklarını Ayşe Hatun’dan sulh yoluyla aldığı Husûs-ı âti’l-beyânın mahallinde ketb ü tahrîri iltimâs olunmağın cânib-i şer‘den Mevlânâ Mehmed Efendi b. Mahmud irsâl olunup ol dahi mahmiye-i İstanbul’da Alipaşa-i atîk mahallesinde sâkin iken bundan akdem vefât eden el-Hâc Hüseyin b. Ramazan’ın menziline varıp zeyl-i kitâbda isimleri mastûr Müslimîn huzûrlarında akd-i meclis-i şer‘-i âlî ettikde müteveffâ-yı mezbûrun verâseti zevce-i menkûha-i metrûkesi Âişe Hatun bt. Abdurrahman Efendi ile li-ebeveyn er karındaşı Mehmed’in kebîre kızları Râbia ve Ümmühani nâm hatunlara ve li-ebeveyn kız karındaşı Ümmühani’nin kebîre kızı Rukiye bt. Mustafa ile kebîr oğlu el-Hâc Halil Beşe b. İbrahim’e münhasıra ve tashîh meselesi on iki sehmden olmağla sihâm-ı mezbûrenin üç sehmi zevcesi mezbûre Âişe Hatun’a ve üçer sehmi mezbûretân Râbia ve Ümmühani’den her birine ve bir sehmi mersûme Rukiye’ye ve iki sehmi merkūm el-Hâc Halil Beşe’ye isâbeti [5a] tahakkukundan sonra zâtları mahalle-i mezbûre sâkinlerinden Ali Beşe b. Mustafa ve el-Hâc Süleyman b. Abdülkerim ta‘rîfleriyle mu‘arrefe olan mezbûretân Râbia [ve] Ümmühani meclis-i ma‘kūd-ı mezbûrda zâtı ta‘rîf-i şer‘î ile mu‘arrefe olan işbu hâfızatü’l-kitâb mersûme Âişe Hatun mahzarında her biri ikrâr ve takrîr-i kelâm edip mûrisimiz müteveffâ-yı mezbûrun terekesinden tashîh-i mezbûr üzere bize isâbet eden altı sehmimiz mukābelesinde şurût-ı sıhhati hâvî muvâza‘adan ârî bi-tarîkı’t-tehârüci’ş-şer‘î terekeden işbu bir yeşil çuka ferâce ve bir kalenbek tesbîh ile yüz elli guruşa mezbûre Âişe Hatun ile sulh olup bedel-i sulh olan meblağ-ı mezbûr yüz elli guruş ile zikr olunan ferâce ve tesbîhi mezbûre Âişe Hatun yedinden tamâmen ahz u kabz eyledik ba‘de’l-yevm müteveffâ-yı mezbûrun terekesinden mahalle-i mezbûrede vâki‘ ma‘lûmü’l-hudûd mülk menzil ve sâir nukūd ve urûzundan tashîh-i mezbûr üzere hissemize isâbet eden cemî‘ mîrâs da‘vâsından mezbûre Âişe Hatun’un zimmetini ibrâ-i âmm-ı kâtı‘u’n-nizâ‘la ibrâ ve iskāt eyledik [de]diklerinde gıbbe’t-tasdîkı’ş-şer‘î ve merkūm el-Hâc Halil Beşe asâleten ve mersûme Rukiye bt. Mustafa b. Durmuş tarafından husûs-ı âti’l-beyânda ahz u kabz ve sulh ve ibrâya vekîl olduğu zâtı ma‘rifet-i şer‘iyye ile ârifân İbrahim Beşe b. Hasan ve merkūm el-Hâc Halil Beşe şehâdetleriyle mahzar-ı hasm-ı câhidde sâbit ve sübût-ı vekâletine hükmolunan zevci Abdülaziz Çelebi vekâleten meclis-i ma‘kūd-ı mezbûrda zevce-i mezbûre Âişe Hatun mahzarında her biri ikrâr ve takrîr-i kelâm edip biz dahi tereke-i müteveffâ-yı mezbûrdan tashîh-i mezbûr üzere hissemize isâbet eden üç sehmimiz mukābelesinde vech-i meşrûh üzere terekeden yetmiş beş guruş ve bir makramaya mezbûre Âişe Hatun ile sulh olup bedel-i sulh olan meblağ-ı merkūm yetmiş beş guruş ile makramayı asâleten ve vekâletimiz hasebiyle mezbûre Âişe Hatun yedinden tamâmen ahz u kabz eyledik ba‘de’l-yevm müteveffâ-yı mezbûrun terekesinden menzil-i mezkûr ve sâir nukūd ve urûzundan tashîh-i mezbûr üzere hissemize isâbet eden cemî‘ mîrâs da‘vâsından mezbûre Âişe Hatun’un zimmetini ibrâ ve iskāt eyledik dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ve ba‘dehû ma‘an irsâl olunan Mustafa Beşe b. Abdullah ve Muhzır Mehmed Beşe b. Hüseyin ile mahfil-i kazâya gelip alâ-vukū‘ihi inhâ etmeğin mâ-vaka‘a kayd-şüd Fî 13 Muharrem sene 1110 Şuhûdü’l-hâl: Umdetü’l-erbâbi’t-tahrîr ve’l-kalem Kesrî Mehmed Efendi, Umdetü’l-eimme Mehmed Efendi [b.] Ahmed, Umdetü’l-kuzât Mehmed Efendi b. Hasan, Mehmed Efendi b. Hasan el-Müezzin, Osman Ağa b. Mahmud, Ali Beşe b. Ahmed, Mehmed Çelebi b. İdris, Ömer Efendi b. Mustafa, Mustafa Çelebi b. Hüseyin.