Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 609 Hüküm no: 753 Orijinal metin no: [134a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Hızır’ın menzilinin vârislerince Rabia bt. Mehmed’e satılması Mahmiye-i İstanbul’da Sultan Selim Hân Câmi‘-i şerîfi kurbunda Çukurbostan mahallesinde sâkine iken bundan akdem vefât eden Ayşe bt. Hızır’ın verâseti zevc-i metrûkü Bayram b. Mehmed ile vâlidesi Fâtıma bt. Halil’e ve sadrî kebîr oğlu Ahmed Beşe ve sadrî oğlu Mehmed’e münhasıra olduğu şer‘an mütehakkik oldukdan sonra mezbûrân Ahmed Beşe ve Fâtıma Hâtun asâleten ve mezbûr Bayram kendi tarafından asâleten ve sagīrin babası olmağla velâyeten meclis-i şer‘-i şerîfde işbu bâ‘isetü’l-vesîka Râbia bt. Mehmed mahzarında her biri asâleten ve velâyeten ikrâr ve takrîr-i kelâm edip mûrisimiz müteveffât-ı mezbûre Ayşe Hâtun’un ile’l-vefât mülkü olup ba‘de vefâtihâ irs-i şer‘le bize intikāl eden mahalle-i mezbûrede vâki‘ bir tarafdan Fâtıma Hâtun mülkü ve bir tarafdan Abaza Mehmed b. Ahmed mülkü ve bir tarafdan diğer Fâtıma Hâtun menzili ve bir tarafdan tarîk-i hâs ile mahdûd bir bâb oda ve bir sofa ve kenîfi müştemil menzil mürûr-ı eyyâm ile harâbe müşrif olup imâret ve meremmete iktidârımız olmayıp ve müteveffât-ı mezbûrenin menzil-i mezbûrdan gayrı ism-i mâl ıtlâk [olunan] terekesi kalmamağla menzil-i mezbûrdan cümlemiz hissemizi âhara bey‘ etmek murâd edip ve sagīr-i mezbûrun hissesi ma‘an bey‘ olunmak sagīr-i mezbûr hakkında her vechile enfa‘ ve evlâ olmağın hâlâ menzil-i mezbûr cümle-i tevâbi‘ ve levâhıkı ile tarafeynden îcâb ve kabûlü hâvî bey‘-i kat‘î ile semen-i misli olan elli esedî guruşa mezbûre Râbia Hâtun’a bey‘ ve teslîm ol dahi ber vech-i muharrer iştirâ ve tesellüm ve kabûl ettiğinden sonra semen-i mezbûr elli guruşu mezbûre Râbia Hâtun yedinden tamâmen ahz u kabz eyledik min ba‘d menzil-i mezbûrda hak ve alâkamız kalmamışdır mezbûre Râbia Hâtun’un mülk-i müşterâsı olmuşdur keyfe mâ yeşâ ve yahtâr mutasarrıfe olsun dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin min Şevvâli’l-mükerrem li sene seb‘a ve tis‘în ve elf. Şuhûdü’l-hâl: Ali Efendi imâm-ı mahalle-i mezbûre, el-Hâc Yusuf Halîfe el-Müezzin, el-Hâc Abdülaziz b. Şaban, Hüseyin b. Hüseyin, Mehmed Çelebi b. Kalender, es-Seyyid Osman Çelebi b. pekmezci Ali.