Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 94 Hüküm no: 23 Orijinal metin no: [7a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime Hatun’un malının üçte birini vasiyet edip kocası Ahmed Ağa’yı vasi tayin ettiği Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘-i enverden me’zûnen irsâl olunan Mevlânâ Hâfız Mehmed Efendi b. eş-Şeyh Mustafa mahmiye-i İstanbul’da Atmeydanı kurbünde vâki‘ Hoca Rüstem mahallesinde sâkine Rahime Hatun bt. Abdullah’ın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde zâtı fahrü’l-eimme İbrahim Efendi b. Mustafa ve Mehmed Ağa b. Halil ta‘rîfleriyle mu‘arrefe olan mezbûre Rahime Hatun meclis-i ma‘kūd-ı mezbûrda zevc-i dâhili hâfızü’l-kitâb Ahmed Ağa b. Şa‘bân mahzarında ikrâr ve takrîr-i kelâm edip mübtelâ olduğum marazdan kuvvet ve necât bulmayıp bi-emrillâhi te‘âlâ dâr-ı fenâdan dâr-ı bekāya irtihâl eylediğimde cemî‘ malımın sülüsü ifrâz olunup sülüs-i mezbûrdan iki bin akçe iskāt-ı salâtıma ve üç yüz akçe telkīn edene verile ve hizmetimde olan Ümmügülsüm Hatun’a sülüs-i malımdan bir çift Bursa yasdığı verile ve mu‘takam Belkıs bt. Abdullah’a kezâlik bir minder ve iki Bursa yasdığı ve bir yemenî yorgan ma‘a çârşeb ve iki sahan ma‘a kapak ve iki tencere ve bir güğüm ve bir tâbe ve bir sini verile ve fazlası vücûh-ı birre sarf oluna deyü vasiyet edip tenfîzine zevcim mezbûr Ahmed Ağa’yı vasiyy-i muhtâr nasb ü ta‘yîn eyledim dedikde ol dahi vesâyet-i mezbûreyi kabûl ve merâsimini edâya ta‘ahhüd eylediğini mevlânâ-yı mezbûr mahallinde tahrîr ve ba‘dehû ma‘an ba‘s olunan Mustafa b. Mehmed ve Mehmed b. Abdullah ile meclis-i şer‘a gelip alâ-vukū‘ihi inhâ etmeğin kayd-şüd Fî 17 Muharrem sene 1110 Şuhûdü’l-hâl: İbrahim Efendi b. Mustafa İmâm, İmâmzâde Mehmed Efendi b. İbrahim, Mehmed Ağa b. Halil, Nasuh Bey b. Ahmed, Ahmed Bey b. Ali Bevvâb-ı Sultânî.