Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 610 Hüküm no: 754 Orijinal metin no: [134a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Beşe b. Mehmed’in kardeşi Ali’de alacağı olduğu Dergâh-ı âlî yeniçerilerinin yirmi yedinci sekbânlara mahsûs oda ahâlîsinden Hasan Beşe b. Mehmed nâm kimesne meclis-i şer‘-i şerîfde li ebeveyn karındaşı Ali mahzarında takrîr-i kelâm edip mezbûr Ali târih-i kitâbdan beş ay mukaddem ma‘an sâkin olduğum odada sepetim içinde mahfûz iki yüz on esedî guruşumu fuzûlen ahz edip meblağ-ı mezbûrun elli iki guruşunu kendi mesârifine istihlâk ettiğinden sonra doksan beş guruşunu işbu hâzırân bi’l-meclis Nurses v. Serkis nâm zimmîye ve yetmiş bir guruşunu Murad v. Anvanos nâm zimmîye idâne etmekle meblağ-ı mezbûr doksan beş guruşun yetmiş yedi guruşu gāib ani’l-meclis Solak Hasan Beşe vâsıtası ve on guruşunu bilâ-vâsıta karındaşım mezbûr Ali ma‘rifetiyle ki cem‘an seksen yedi guruşu idâne olunan merkūm Nurses yedinden ahz u istîfâ ve yetmiş bir guruşu dahi merkūm Murad zimmîden ahz u istîfâ edip min haysi’l-mecmû‘ iki yüz on guruşun ber vech-i muharrer yüz elli sekiz guruşunu ahz u istîfâ edip zimmetinde elli iki guruş hakkım bâkī kalmağla suâl olunup takrîri tahrîr olunmak matlûbumdur [dedikde] gıbbe’s-suâl mezbûr Ali cevâbında fi’l-hakīka kaziyye vech-i meşrûh üzre olup mezbûrân Nurses ve Murad yedlerinden ahz olunan yüz elli sekiz guruşdan mâ‘adâ elli iki guruş zimmetinde bâkī kaldığını ikrâr ve i‘tirâf etmeğin vâki‘ hâl hıfzan li’l-makāl bi’t-taleb ketb olundu. Fi’l-yevmi’l-âşir min Şevvâli’l-mükerrem li sene seb‘a ve tis‘în ve elf. Şuhûdü’l-hâl: Mustafa Beşe b. Ali, Ali b. Ahmed el-Mübâşir, Mehmed Beşe b. Ahmed, Nalband Hüseyin Beşe b. Murad, Veli Beşe b. ( ) Muhzır.