Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 96 Hüküm no: 26 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Baltazade Mahmud Paşa’nın varislerinin mirastan olan bahçeyi müştemilatıyla birlikte Rukiye Hatun’a sattıkları Mahmiye-i İstanbul’da Molla Hüsrev mahallesi ahâlîsinden olup vezâretle yeniçeri ağası iken sene-i sâbıkada Nemçe keferesi muhârebesinde şehîden vefât eden merhûm Baltazâde Mahmud Paşa b. Ahmed Ağa’nın verâseti zevce-i metrûkesi fahrü’l-muhadderât Âişe Hanım bt. Osman Efendi’ye ve sagīre kızı Fâtıma Hanım ile li-ebin karındaşı zahrü’l-eşbâh Mehmed Ağa’ya münhasıra olup ba‘dehû sagīre-i mezbûre Fâtıma Hanım dahi fevt olup verâseti li-ümmin karındaşı sagīr Hüseyin b. el-Hâc Mehmed’e ve li-ebin ammi mezbûr Mehmed Ağa’ya münhasıra ve tashîh meselesi bi-tarîkı’l-münâsahati yirmi dört sehmden olmağla sihâm-ı mezbûrenin bir mertebede üç sehmi mezbûre Âişe Hanım’a ve iki sehmi sagīr-i mezbûr Hüseyin’e ve bâkī on dokuz sehmi iki mertebede mezbûr Mehmed Ağa’ya isâbeti tahakkukundan sonra mezbûr Mehmed Ağa asâleten ve sagīr-i mezbûr Hüseyin’in babası ve velîsi mezbûr el-Hâc Mehmed b. Mustafa velâyeten ve mezbûre Âişe Hanım tarafından husûs-ı âti’l-beyânda vekîl olduğu zâtını ma‘rifet-i şer‘iyye ile ârifân Ali Ağa b. Ahmed ve mezbûr el-Hâc Mehmed b. Mustafa şehâdetleriyle hasm-ı câhid mahzarında şer‘an sâbit ve mahkûmun-bih olan fahrü’l-eşbâh el-Hâc Üveys Ağa b. Osman dahi vekâleten meclis-i şer‘de mahmiye-i mezbûrede Sancakdâr Hayreddin mahallesinde sâkine zahrü’l-muvakkarât Rukiye Hatun bt. Abdullah b. Abdullah’ın zevci ve tarafından husûs-ı âti’l-beyânda vekîl-i müsecceli olup Enderûn-ı hümâyûn’da Hâs oda gulâmı mütekā‘idlerinden umdetü’l-havâssi’l-muvakkarîn işbu bâ‘isü’l-kitâb Dâyezâde Yusuf Ağa b. Abdullah mahzarında her biri ikrâr ve takrîr-i kelâm edip işbu defter-i kassâm-ı askerî nâtık olduğu üzere merhûm-ı müşârün-ileyhin ile’l-vefât müstakillen mülkü ve hakkı olup mahmiye-i mezbûrede Yenikapı hâricinde Mevlevîhâne kurbünde vâki‘ iki tarafdan merhûm Amuca Hasan Ağa bahçesi ve bir tarafdan merhûm Ebrû Efendi bahçe[si] ve bir tarafdan tarîk-i âmla mahdûd hâriciyesi fevkānî dört oda ve iki sofa ve bir kenîf ve tahtânî ahır ve kenîf ve havluyu ve bir su kuyusu ve bir havuz ve dâhiliyesi iki oda ve bir matbah ve ahır ve su kuyusu ve bir kebîr dolab kapısı ve eşcâr-ı müsmire ve gayr-ı müsmireyi müştemil Büyükbahçe ta‘bîr olunur mülk menzili izn-i şer‘le beş ay mikdârı sûk-ı sultânîde ve mecâmi‘-i nâsda ba‘de’n-nidâ ve’l-müzâyede ve inkıtâ‘i’r-rağabât müvekkile-i mezbûre Rukiye Hatun’un üzerinde sekiz yüz guruşda karâr edip ziyâde ile tâlib-i âhar zuhûr etmeyip ve meblağ-ı mezbûr sekiz yüz guruş yevm-i akidde mebî‘-i mezbûrun semen-i misli olduğu sikāt ihbârlarıyla lede’ş-şer‘ zâhir ve müte‘ayyin olmağla biz dahi asâleten ve velâyeten ve vekâleten mahdûd-ı mezbûru bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık bey‘-i bâtt-ı kat‘î ile zarûret-i deyn içün vekîl-i mûmâ-ileyh es-Seyyid Yusuf Ağa’ya sekiz yüz guruşa bey‘ ve teslîm ol dahi müvekkilesi mezbûre Rukiye Hatun içün bi’l-vekâle iştirâ ve temellük ve tesellüm ve kabûl ettiğinden sonra semeni olan meblağ-ı mezbûr sekiz yüz guruşu müteveffâ-yı müşârün-ileyhin dâyinlerine vermek içün müvekkile-i mezbûre Rukiye Hatun’un malından vekîl-i mûmâ-ileyh Yusuf Ağa yedinden bi’t-tamâm ve’l-kemâl ahz u kabz eyledik ba‘de’l-yevm hudûd-ı mezkûre ile mahdûd olan bahçe-i mezbûr cümle müştemilâtıyla müvekkile-i mezbûre Rukiye Hatun’un mülk-i müşterâsı ve hakk-ı sırfı olmuşdur keyfe mâ teşâ ve tehtâr mutasarrıfe olsun dediklerinde gıbbe’t-tasdîkı’ş-şer‘î mâ-vaka‘a kayd-şüd Fî 17 Muharrem sene 1110 Şuhûdü’l-hâl: Umdetü’l-eimme Ömer Efendi b. Muslu İmâm-ı Ayasofya, Hüseyin Efendi b. ( ) İmâm-ı ocak, el-Hâc Ali Ağa Sersekban-ı sâbık, el-Hâc İsmail b. Mehmed, Ali Ağa b. Ahmed, el-Hâc Hasan Çavuş b. Mehmed, Ahmed Çelebi b. Süleyman, el-Hâc Abdullah Çukadâr, Mehmed Efendi b. İbrahim, Kara Mehmed b. Hüseyin, İbrahim Çelebi b. Mehmed.