Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 119 Hüküm no: 38 Orijinal metin no: [13b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed Efendi’nin Mustafa’ya olan borcunun terekesinden ödenmesi Mahmiye-i İstanbul’da Debbâğ Yunus mahallesinde sâkin bâ‘isü’l-kitâb el-Hâc Mustafa b. Hüseyin nâm kimesne mahfil-i kazâda mahmiye-i mezbûrede Cevvîzâde mahallesi ahâlîsinden olup Mısır’dan gelirken sefînede bundan akdem vefât eden Mehmed Efendi b. Mustafa’nın sulbî oğlu Abdullah nâm sagīrin tesviye-i umûruna savb-ı şer‘den mansûb vasîsi olmağla terekesine vâzı‘u’l-yed olan li-ebeveyn kız (er) karındaşı Süleyman Çelebi b. Mustafa muvâcehesinde üzerine da‘vâ ve takrîr-i kelâm edip müteveffâ-yı mezbûr zimmetinde yedimden müşterâ ve makbûz vezn ve mikdârı beynimizde ilm-i şer‘î ile ma‘lûm yağ ve bal semenlerinden ba‘de-külli’l-hesâb elli guruş hakkım olup hattâ hâl-i kemâl-i sıhhatinde fevtinden iki buçuk sene mukaddem cihet-i merkūmeden bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı Müslimînden Emin Bey mahallesinde Hüseyin Efendi b. Osman ve Süleymaniye mahallesinde İsmail Çelebi b. Mehmed li-ecli’ş-şehâde meclis-i şer‘a hâzırân olup istişhâd olundukda fi’l-hakīka [14a] müteveffâ-yı mezbûr Mehmed Efendi b. Mustafa hâl-i kemâl-i sıhhatinde fevtinden iki buçuk sene mukaddem yedinden müşterâ ve makbûz vezn ve mikdârı beynlerinde ma‘lûm yağ ve bal semenlerinden ba‘de-külli’l-hesâb müdde‘î-i mezbûra zimmetinde elli guruş deyni olduğunu huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a kayd-şüd. Fî 20 min-Muharrem sene 1110 Şuhûdü’l-hâl: es-Seyyid Abdülmuti Efendi, es-Seyyid Abdullah Efendi b. İbadzâde, Mehmed Rûşenî Efendi b. ( ), Çukadâr el-Hâc Abdullah.