Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 120 Hüküm no: 39 Orijinal metin no: [14a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pir Mehmed Ağa’nın vefat eden hanımı Ayşe Hatun’un kendisini vasi tayin ettiğinden vasiyet tutarının terekeden kendisine teslim edilmesi Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘den me’zûnen irsâl olunan Mevlânâ Şeyhzâde Ahmed Efendi mahmiye-i İstanbul’da Dâye Hatun mahallesinde sâkine iken bundan akdem vefât eden Âişe Hatun bt. Mehmed’in menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffât-ı mezbûrenin zevci ve vech-i âtî üzere vesâyetini tenfîze vasiyy-i muhtârı olduğunu iddi‘â eden hâfızü’l-kitâb Pir Mehmed Ağa b. Mehmed meclis-i ma‘kūd-ı mezbûrda müteveffât-ı mezbûrenin kebîr oğlu olup terekesine bi’l-verâse vâzı‘u’l-yed olan Mehmed Efendi mahzarında üzerine da‘vâ ve takrîr-i kelâm edip zevcem müteveffât-ı mezbûre Âişe Hatun bt. Mehmed b. ( ) hâl-i marazında fevtinden on altı [gün] mukaddem bi-emrillâhi te‘âlâ kazâ-i nahb eylediğimde terekemin sülüsünden yüz elli guruş ifrâz olunup meblağ-ı mezbûrun yüz guruşu ile iskāt-ı salât ve eyyâm-ı mu‘tâdede tabh-ı ta‘âm ve it‘âm-ı fukarâ oluna ve otuz guruşu dâyem La‘lgûn bt. Abdullah’a verile ve on guruşu mu‘takam Sâkine’ye verile ve on guruşu kızım Hadîce’nin dâyesine ver deyü huzûr-ı Müslimînde vasiyet edip tenfîzine ve sagīre kızım mezbûre Hadîce ile sagīr oğlu Osman’ın tesviye-i emrlerine beni vasî nasb ve ihtiyâr edip ben dahi muvâcehesinde ba‘de’l-kabûl musırran-aleyhâ fevt olup terekesinin sülüsü meblağ-ı mûsâ-bih-i mezbûra vâfî ve kâfî olmağla tenfîz-i vesâyâ murâd eylediğimde mezbûr Mehmed Efendi mâni‘ olur suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı Müslimînden mahalle-i mezbûre ahâlîsinden umdetü’l-müderrisîni’l-kirâm Murad Efendi b. Ali ve İmâm Mehmed Efendi b. Süleyman li-ecli’ş-şehâde meclis-i şer‘a hâzırân olup istişhâd olundukda fi’l-hakīka müteveffât-ı mezbûre Âişe hâl-i marazında fevtinden on altı gün mukaddem bi-emrillâhi te‘âlâ kazâ-i nahb eylediğimde terekemin sülüsünden yüz elli guruş ifrâz olunup meblağ-ı mezbûrun yüz guruşu ile iskāt-ı salâtım ve eyyâm-ı mu‘tâdede tabh-ı ta‘âm ve it‘âm-ı fukarâ oluna ve otuz guruşu dâyem La‘lgûn bt. Abdullah’a verile ve on guruşu müdebberem Sâkine’ye verile ve on guruşu kızım Hadîce’nin dâyesine verile deyü huzûrumuzda vasiyet edip ve tenfîzine ve sagīre kızı mezbûre Hadîce ile sagīr oğlu Osman’ın tesviye-i emrlerine müdde‘î-i mezbûr Pir Mehmed Ağa’yı vasî nasb ve ihtiyâr ettikde ol dahi muvâcehesinde ba‘de’l-kabûl musırran-aleyhâ fevt oldukda terekesinin sülüsü meblağ-ı mûsâ-bih-i mezbûra vâfî ve kâfîdir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahallinde tahrîr ma‘an ba‘s olunan Ahmed Çelebi b. Süleyman ile meclis-i şer‘a gelip alâ-vukū‘ihi inhâ etmeğin mâ-vaka‘a kayd-şüd. Fî 26 min-Muharrem sene 1110 Şuhûdü’l-hâl: Hüseyin Efendi b. Ramazan, el-Hâc Mustafa b. Hüseyin, el-Hâc Ali b. Hüseyin, Mustafa Çelebi b. Ahmed, Ahmed Çelebi b. Mehmed.