Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 121 Hüküm no: 40 Orijinal metin no: [14a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İmam Mustafa Efendi’nin vefat eden Ali Efendi’de kitap bedelinden alacağı olan paranın terekesinden ödenmesi Mahmiye-i İstanbul’da Nişancı mahallesi ahâlîsinden işbu bâ‘isü’l-kitâb İmâm Mustafa Efendi b. Receb mahfil-i kazâda mahmiye-i mezbûrede Ayasofya-i kebîr kurbünde Üskübî mahallesi sükkânından olup Mekke-i mükerreme kazâsından Maaz’da(?) vedâ‘-ı âlem-i fânî eden merhûm Ali Efendi b. Hüseyin’in zevce-i menkûha-i metrûkesi fahrü’l-muhadderât Safiye Hatun bt. Mustafa Ağa b. Hasan tarafından husûs-ı âti’z-zikrde husûmet ve redd-i cevâba vekîl-i müsecceli mezbûr Mustafa Ağa b. Hasan mahzarında üzerine da‘vâ ve takrîr-i kelâm edip târîh-i nemîkadan altı sene mukaddem müteveffâ-yı mezbûr Ali Efendi b. Hüseyin b. Ahmed’e menzilinde bir Me‘âlimü’t-tenzîl ve bir Fetvâ-i Ebussuud ve bir Sadrü’ş-şerî‘a Şerh-i Yakub Paşa ve bir Sicilli’l-ahkâm? ve bir Târîh-i Habeş ve bir Sadrü’ş-şerî‘a ve bir Mutavvel ve Şerh-i Mevâfık ve bir Dürer ve Enîsî ve bir metn-i Dürer ve bir Şerh-i Kebîr-i İbrahim Halebî ve bir Ahterî-i Kebîr ve bir Kādı Beydâvî nâm kitâblarımı bi-safkatin vâhidetin beş yüz yedi guruşa bey‘ ve teslîm ve temellük ol dahi ber-vech-i muharrer yedimden iştirâ ve tesellüm ve temellük ve kabûl edip hattâ hâl-i kemâl-i sıhhatinde cihet-i mezbûreden zimmetinde bana reddi vâcib ol kadar guruş deyni olduğunu fevtinden bir ay mukaddem huzûr-ı Müslimînde ikrâr ve işhâd ettikden sonra meblağ-ı mezbûru kable’r-red ve’l-edâ irtihâl-i dâr-ı bekā etmeğin tereke-i vâfiyesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb [14b] olundukda udûl-ı Müslimînden zikr olunan Nişancı mahallesinden Mehmed Efendi b. Ahmed ve mahmiye-i mezbûrede Hobyar mahallesi ahâlîsinden diğer Mehmed Efendi b. Ömer li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Ali Efendi b. Hüseyin b. Ahmed hâl-i kemâl-i sıhhatinde yedimden müşterâ ve makbûz bir Me‘âlimü’t-tenzîl ve bir Fetvâ-i Ebussuud ve bir Sadrü’ş-şerî‘a Şerh-i Yakub Paşa ve bir Sicillü?’l-ahkâm ve bir Târîh-i Habeş ve bir Sadrü’ş-şerî‘a ve bir Mutavvel ve bir Şerh-i Mevâfık ve bir Dürer ve Enîsî ve bir metn-i Dürer ve bir Şerh-i Kebîr-i İbrahim Halebî ve bir Ahterî-i Kebîr ve bir Kādı Beydâvî nâm kitâblar bahâsından zimmetimde işbu müdde‘î-i mezbûr İmâm Mustafa Efendi’ye reddi vâcib beş yüz yedi guruş deyni olduğunu fevtinden bir ay mukaddem huzûrumuzda ikrâr ve işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde şâhidân-ı mezbûrân-ı tezkiye içün cânib-i şer‘den Mevlânâ Abdurrahman Efendi b. el-merhûm Ahmed Efendi ba‘s olunup ol dahi evvelâ şâhid-i mezbûr Mehmed Efendi’nin sâkin olduğu sâbıku’l-beyân Nişancı mahallesine varıp ahâlîsinden Müezzin Mehmed Efendi b. Receb ve Abdullah Çelebi b. Receb ve Ahmed Ağa b. Beşir ve Ahmed Çelebi b. Halil ve Mehmed Çelebi b. Ali nâm kimesnelerden keyfiyet-i hâlini suâl ettikde her biri adl ve makbûlü’ş-şehâdedir velev aleynâ ve sâniyen şâhid-i mezbûr diğer Mehmed Efendi’nin sâkin olduğu mârrü’z-zikr Hobyar mahallesine varıp sükkânından Salih Çelebi b. Zülfikar ve Ahmed Çelebi b. Mehmed ve Mehmed Çelebi b. Mustafa ve Mehmed Beşe b. Ahmed ve Kenan b. Abdullah nâm kimesnelerden keyfiyet-i hâlini tefahhus ettikde her biri adl ve câizü’ş-şehâdedir velev aleynâ deyü haber verdiklerini mevlânâ-yı mezbûr mahallerinde tahrîr ve ma‘an mürsel Hasan b. Abdullah ile meclis-i şer‘a gelip inhâ ve takrîr etmekle şehâdetleri makbûle oldukdan sonra gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a kayd-şüd. Fî 10 min-Muharrem sene 1110 Şuhûdü’l-hâl: es-Seyyid Abdülmuti Efendi b. ( ), es-Seyyid Abdullah Efendi İbâdzâde, Mehmed Rûşenî Efendi b. İbrahim, Abdurrahim Aziz Efendi, Mehmed Efendi b. Sunullah, Mehmed Çelebi b. Hüseyin, Ahmed b. Süleyman.