Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 127 Hüküm no: 47 Orijinal metin no: [16a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın varislerinin ev hisselerini Nimetullah Hatun’a sattıkları Husûs-ı âti’l-beyânın mahallinde ketb ü tahrîr[i] iltimâs olunmağın savb-ı şer‘den Mevlânâ es-Seyyid Abdullah Efendi b. Ahmed Efendi irsâl olunup ol dahi mahmiye-i İstanbul’da Hoca Kasım Gönânî mahallesinde sâkin iken bundan akdem vefât eden Mehmed Ağa b. İbrahim b. Abdullah’ın menziline varıp zeyl-i kitâbda muharrerü’l-esâmî Müslimîn huzûr[larında] akd-i meclis-i şer‘-i nebevî eyledikde müteveffâ-yı mezbûrun verâseti zevce-i menkûha-i metrûkesi Nimetullah Hatun bt. Ali’ye ve sagīre kızı Rukiye’ye ve kebîre kızı Safiye’ye ve kebîr oğulları İbrahim Efendi ve Ahmed’e münhasıra olup ve tashîh meselesi kırk sekiz sehmden olmağla sihâm-ı mezbûrenin altı sehmi zevcesi mezbûre Nimetullah Hatun’a ve bâkī kırk iki sehmin yedişer sehmi kızları mezbûre Rukiye ve Safiye’den her birine ve on dörder sehmi oğulları mezbûr İbrahim Efendi ve Ahmed’den her birine isâbeti tahakkukundan sonra mezbûr İbrahim Efendi asâleten ve mezbûr Ahmed dahi asâleten ve kebîre li-ebeveyn kız karındaşı mezbûre Safiye tarafından husûs-ı âti’l-beyânda vekîl olduğu zât-ı mezbûreyi ma‘rifet-i şer‘iyye ile ârifân mahalle-i mezbûre[de] sâkin Mehmed Efendi b. Eyüb ve İbrahim b. Ahmed şehâdetleriyle mahzar-ı hasm-ı câhidde sâbit ve sübût-ı vekâletine hükmolunmağla vekâleten meclis-i ma‘kūd-ı mezbûrda zâtı ta‘rîf-i şer‘î ile mu‘arrefe olan işbu hâzıratü’l-kitâb zevcesi mezbûre Nimetullah Hatun mahzarında her biri ikrâr ve takrîr-i kelâm edip müteveffâ-yı mezbûrun hîn-i fevtine gelince yedinde mülk ve hakk-ı müsbeti olan mahalle-i mezbûrede vâki‘ bir tarafdan Hasan Beşe b. Abdullah menziline ve bir tarafdan Emetullah Hatun bt. Abdullah menziline ve bir tarafdan tarîk-i hâssa ve bir tarafdan tarîk-i âmma müntehî üç bâb fevkānî oda ve iki bâb tahtânî oda ve bir matbah ve bir mağsel ve müşterek bi’r-i mâ ve ahırı ve fevkānî ve tahtânî iki kenîf ve zât-ı eşcâr hadîkayı ve havluyu müştemil mülk menzilin nısf-ı şâyi‘i mezbûre Nimetullah Hatun’un mülk ve hakkı ve nısf-ı şâyi‘-i âhiri müteveffâ-yı mezbûrun mülkü olmağla nısf-ı şâyi‘-i âhiri ba‘de’l-müzâyede mezbûre Nimetullah’ın üzerinde iki yüz yetmiş guruşda karâr etmekle nısf-ı şâyi‘-i âhirde tashîh-i mezbûr üzere mezbûre Nimetullah’a isâbet eden altı sehmden mâ‘adâ bize isâbet eden otuz beş sehm-i şâyi‘amızı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mezbûre Nimetullah Hatun’a yüz doksan beş buçuk guruşa bey‘ ve teslîm ol dahi iştirâ ve tesellüm edip semeni olan meblağ-ı mezbûr iki yüz yetmiş [guruşun] iki yüz elli guruşunu merkūmenin mehr-i müeccel-i müsbeti olan iki yüz elli guruşa takas ol dahi mukāssa ve kabûl edip bâkī yirmi guruşunu dahi beynimizde iktisâm içün defter-i kassâma idhâl eyledik ba‘de’l-yevm mebî‘-i mezkûr merkūme Nimetullah’ın mülk-i müşterâsı olup keyfe mâ teşâ ve tehtâr mutasarrıfe olsun dediklerinde gıbbe’t-tasdîk sagīre-i mezbûre Rukiye’nin tesviye-i umûruna kıbel-i şer‘den vasiyy-i mansûbu olan mezbûr İbrahim Efendi meclis-i ma‘kūd-ı mezbûrda mezbûre Nimetullah Hatun mahzarında bi’l-vesâye ikrâr ve takrîr-i kelâm edip menzil-i mahdûd-ı mezkûrda sagīre-i mezbûreye isâbet eden yedi sehm-i şâyi‘in [16b] kendüye nef‘ ve yarar vech üzere ifrâzı mümkün olmamağla tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile kırk buçuk guruşa mezbûre Nimetullah Hatun’a bey‘ ve teslîm ol dahi iştirâ ve tesellüm edip semeni olan meblağ-ı mezbûr kırk buçuk guruşu dahi bâlâda zikr olunduğu üzere takas olunup ba‘de’l-yevm mebî‘-i mezbûr dahi mezbûre Nimetullah Hatun’un mülk-i müşterâsıdır keyfe mâ teşâ ve tehtâr mutasarrıfe olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ma‘an ba‘s olunan Hüseyin b. Mehmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fi 5 min-Zilhicce sene 1109 Şuhûdü’l-hâl: Fahrü’l-müderrisîn Mehmed Efendi b. Eyüb, Mustafa Efendi b. Mehmed el-İmâm, Mehmed Odabaşı b. Abdullah, İbrahim b. Mehmed, Mustafa b. Mehmed, Hüseyin Çelebi b. Mehmed Muhzır, Hasan b. Abdullah.