Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 135 Hüküm no: 52 Orijinal metin no: [18a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Afife Hatun’un validesinin miras hissesini damadı Mustafa’dan aldığı Kezâlik akd-i meclis-i şer‘-i şerîf ettikde mezbûr el-Hâc Mustafa’nın zevce-i menkûha <>sı olmağla menzil-i mezbûrda sâkine iken bundan akdem vefât eden Afife bt. Receb b. Abdullah’ın verâseti zevc-i metrûku mezbûr el-Hâc Mustafa ile vâlidesi Saliha Hatun bt. Ali’ye ve sagīr oğlu Osman’a münhasıra ve tashîh-i meselesi on iki sehmden olmağla sihâm-ı mezbûrenin üç sehmi zevci mezbûr el-Hâc Mustafa’ya ve iki sehmi vâlidesi mezbûre Saliha Hatun’a ve bâkī yedi sehmi sagīr-i mezbûr Osman’a isâbeti tahakkukundan sonra zâtı kebîr oğlu el-Hâc İbrahim b. Receb ve Eyüb Çelebi b. Hasan ta‘rîfleriyle mu‘arrefe olan mezbûre Saliha meclis-i ma‘kūd-ı mezbûrda müteveffât-ı mezbûrenin terekesine vaz‘-ı yed eden bâ‘isü’l-kitâb mezbûr el-Hâc Mustafa mahzarında ikrâr ve takrîr-i kelâm edip kızım müteveffât-ı mezbûrenin terekesi tahrîr ve ba‘de ihrâci’l-mesârif ber-mûceb-i defter-i kassâm-ı askerî para dört hesâbı üzere bâkī kalan yüz yetmiş iki bin altı yüz kırk akçeden tashîh-i mezbûr üzere hakkıma isâbet eden yirmi sekiz bin yedi yüz yetmiş iki akçe hakkımı terekeden olmak üzere mezbûr el-Hâc Mustafa yedinden tamâmen ahz u kabz eyledim min-ba‘d yedinde ve zimmetinde bir akçe ve bir habbe hakkım bâkī kalmayıp hisseme isâbet eden âmme-i mîrâs da‘vâsından mezbûr el-Hâc Mustafa’nın zimmetini ibrâ ve iskāt eyledim dedikde gıbbe’t-tasdîkı’ş-şer‘î vâki‘ hâli kezâlik inhâ etmeğin mâ-vaka‘a kayd-şüd. Fî 3 Muharrem sene 1110 Şuhûdü’l-hâl: Es-sâbikūn es-sâbikūn.