Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 52 Hüküm no: 37 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arnavut İbrahim’in borcuna karşılık bağını Salih ve ortağına sattığı Yakacık karyesinde sâkin Arnavud İbrahim b. Hasan meclis-i şer‘-i hatîrde Tophane’de vâki‘ Karabaş mahâllesinde sâkin işbu bâ‘iseteyi’l-vesîka Bostanî el-Hâc Mehmed b. el-Hâc Salih ve şerîki Agik v. Baron mahzarlarında bi-tav‘ihi ikrâr ve takrîr-i kelâm edüp akd-i âti’z-zikrin sudûruna değin yedimde mülk ve hakkım olup ze‘âmet toprağında Havuz nâm mevzi‘de vâki‘ bir tarafı Hüseyin Ağa ve el-Hâc Mustafa Ağa bağı ve bir tarafı el-Hâc İbrahim veresesi bağı ve bir tarafı boz hâlî ve bir tarafı tarîk-i âm ile mahdûd tahmînen sekiz dönüm ber-vech-i mülk kiraz eşcârıyla dut ve çavuş bağımı ve yine bir buçuk dönüm hudûd dâhilinde vâki‘ tarlayı bâ-izn-i sâhib-i arz müşteriyân-ı mezbûrâna iki yüz elli iki guruş bi-safka-i vâhide bey‘ u teslîm ve temlîk eylediğimde ol dahi [onlar dahi] ber-vech-i muharrer iştirâ ve tesellüm ve temellük ve kabz u kabûl eylediklerinden sonra semeni olan meblağ-ı mezkûr iki yüz elli iki guruşu benim zimmetimde ve vâcibü’l-ed[â] dakīk-i hâs semeninden iki yüz elli iki guruş deynim olup deyn-i mezkûra takās ve mahsûb onlar dahi ber-vech-i muharrer mukāssa ve kabûl edüp fîmâ-ba‘d mârrü’z-zikr bağda benim kat‘â alâka ve medhalim kalmayup müşteriyân-ı mezkûrânın mülk-i müşterâları ve hakk-ı sırfları olmuşdur keyfe mâ yeşâ ve yehtâr mutasarrıf olsun[lar] dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min-Saferi’l-hayr li-sene seb‘a ve seb‘în ve mi’ete ve elf. Şuhûdü’l-hâl: Hüseyin Ağa, Serdâr Mehmed Efendi, Ahmed Efendi, Hasan Usta, Kansızoğlu Molla Mehmed, Çolak Ali Beşe, Hüseyin Beşe Hüddâm Zâbiti?, İmam Mustafa Efendi.