Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 611 Hüküm no: 756 Orijinal metin no: [134b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. Abdullah’ın Mustafa b. Abdullah’a at satışından ve ödünçten 26 kuruş borcu olduğu Vilâyet-i Anadolu’da Taşköprü kasabası ahâlîsinden olup bundan akdem Serdengeçdi ağası olan Mustafa b. Abdullah tarafından husûs-ı âti’l-beyâna vekîl olduğu Mustafa b. Hasan ve İbrahim b. Mehmed nâm kimesneler şehâdetleriyle şer‘an sâbit olan işbu râfi‘ü’l-kitâb Hasan b. Hasan nâm kimesne meclis-i şer‘-i şerîf-i enverde kasaba-i mezbûre sükkânından Hüseyin b. Abdullah mahzarında bi’l-vekâle üzerine da‘vâ ve takrîr-i kelâm edip müvekkilim mezbûr Mustafa’nın mezbûr Hüseyin zimmetinde yedinden müşterâ ve makbûz evsâfı beynlerinde ma‘lûm iki re’s bârgir semeninden yirmi guruş ve cihet-i karz-ı şer‘îden altı guruş ki cem‘an yirmi altı guruş hakkı olup hattâ mezbûr Hüseyin müvekkilim mezbûr Mustafa’ya ber vech-i muharrer ciheteyn-i mezbûreteynden yirmi altı guruş deyni olduğunu huzûr-ı müslimînde ikrâr dahi ettiğinden sonra meblağ-ı mezbûrun on guruşunu müvekkilim mezbûra edâ ve teslîm ol dahi yedinden ahz u kabz edip on altı guruş zimmetinde bâkī kalmağla hâlâ suâl olunup meblağ-ı bâkī-i mezbûru bana edâ ve teslîme tenbîh olunmak matlûbumdur dedikde gıbbe’s-suâl ve’l-inkâr, müdde‘î-i mezbûrdan müdde‘âsına mutâbık beyyine taleb olundukda kasaba-i mezbûre ahâlîsinden olup Sultan Bayezid-i Velî kurbunda müsâfiren sâkin olan Ali Beşe b. Şaban ve Bahri Efendi b. Mehmed nâm kimesne li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Hüseyin b. Abdullah müvekkil-i mezbûr Mustafa’ya iki re’s bârgir bahâsından ve cihet-i karzdan cem‘an yirmi altı guruş zimmetinde deyni olduğunu bundan akdem bizim huzûrumuzda ikrâr ve bizi işhâd eyledi biz bu husûsa bu vech üzre şâhidleriz şehâdet dahi ederiz deyû edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince ba‘de’l-hükm meblağ-ı bâkī-i mezbûr on altı guruşu vekîl-i mezbûr Hasan’a edâ ve teslîme merkūm Hüseyin’e tenbîh olunup mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Hüseyin b. Mustafa, Hasan b. Mehmed, Ali b. Bâli, Mehmed b. Hasan.