Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 612 Hüküm no: 757 Orijinal metin no: [134b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Mustafa b. Nasuh’un Halil b. Ahmed’e arpa bedelinden borcu olduğu Mahmiye-i İstanbul’da Arpa iskelesi kurbunda sâkin işbu bâ‘isü’l-kitâb el-Hâc Mustafa b. Nasuh meclis-i şer‘-i şerîf-i enverde Halil b. Ahmed nâm kimesne mahzarında üzerine [da‘vâ] ve takrîr-i kelâm edip târih-i kitâb senesi şehri Ramazâni’l-mübâreki’nin on beşinci günü bin yedi yüz elli dört buçuk keyl arpamı beher keyl seksen altışar akçeye olmak üzre bey‘ ve teslîm ol dahi minvâl-i meşrûh üzre iştirâ ve kabûl eyledikden sonra mârrü’z-zikr arpadan hâlâ mevcûd olan yedi yüz otuz sekiz keyl arpayı bi’t-terâzî bana teslîm ben dahi ahz u kabz edip mâ‘adâ âhara bey‘ ile istihlâk eylediği bin on altı buçuk keyl arpanın semeninden müctemi‘ olan seksen yedi bin dört yüz on dokuz akçeyi bana teslîmden imtinâ‘ eder suâl olunup bana edâya mezbûr Halil’e tenbîh olunması matlûbumdur dedikde gıbbe’s-suâl mezbûr Halil cevâbında fi’l-hakīka bâlâda ketb ü tahrîr olunan minvâl üzre müdde‘î-i mezbûra teslîm olunan yedi yüz on sekiz keyl arpadan mâ‘adâ iştirâ eyleyip âhara bey‘ ve istihlâk eylediğim bin on altı buçuk keyl arpanın semenleri olan meblağ-ı mezbûr seksen yedi bin dört yüz on dokuz akçe müdde‘î-i mezbûra zimmetinde lâzımü’l-edâ deyni olduğunu tâyi‘an ikrâr ve i‘tirâf etmeğin alâ mûcebi i‘tirâfihî meblağ-ı mezbûru müdde‘î-i mezkûra edâ ve teslîme mezbûr Halil’e tenbîh olunup mâ vaka‘a bi’t-taleb ketb olundu. Fi’l-yevmi’s-sânî aşer min Şevvâli’l-mükerrem li sene seb‘a ve tis‘în ve elf. Şuhûdü’l-hâl: İbrahim Çelebi [b.] Ahmed, Mustafa Çelebi b. Ahmed, Mustafa Çelebi b. Abdurrahman, Mehmed b. İdris, Mustafa b. Hüseyin el-Mübâşir.