Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 142 Hüküm no: 57 Orijinal metin no: [19b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hatice Hatun’un miras hissesinin yarısının beytülmâle teslim edildiği Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘den Mevlânâ es-Seyyid İsmail Efendi b. es-Seyyid Ahmed Efendi irsâl olunup mahmiye-i İstanbul’da Firuz Ağa mahallesinde sâkine iken bundan akdem vefât eden Hadîce Hatun bt. Abdullah’ın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffât-ı mezbûrenin verâseti zâhirde zevc-i metrûku es-Seyyid Mahmud Ağa b. Ahmed’den gayrı vâris-i ma‘rûfu olmamağla terekesinin nısfı merkūm es-Seyyid Mahmud Ağa’ya ve nısf-ı âhiri cânib-i beytülmâle âid oldukdan sonra mahmiye-i mezbûrede bi’l-fi‘il beytülmâli’l-havâs emîni fahrü’l-akrân Mustafa b. Abdullah meclis-i ma‘kūd-ı mezbûrda müteveffât-ı mezbûrenin zevci ve terekesine bi’l-verâse vaz‘-ı yed eden hâfızü’l-kitâb es-Seyyid Mahmud Ağa b. el-mezbûr Ahmed mahzarında bi’l-emâne ikrâr-ı tâm ve takrîr-i kelâm edip müteveffât-ı mezbûrenin terekesi tahrîr ve defter olunup eşyâ-i mebî‘a ve menzil semenlerinden ve mehirden ba‘de ihrâci’l-mesârif sahhe’l-bâkī ber-mûceb-i defter-i kassâm-ı askerî cânib-i beytülmâl içün nısf hisseye isâbet eden elli dört bin akçeyi merkūm es-Seyyid Mahmud Ağa yedinden bi’l-emâne [20a] tamâmen alıp kabz eyledim ba‘de’l-yevm tereke-i müteveffât-ı mezbûreden ber-mûceb-i defter-i mezbûr merkūm es-Seyyid Mahmud Ağa yedinde ve zimmetinde bir akçe ve bir habbe bâkī kalmamışdır dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an mürsel Mehmed Bey b. Osman ve Mustafa b. Mehmed ile meclis-i şer‘a gelip alâ-vukū‘ihi inhâ etmeğin mâ-vaka‘a kayd-şüd. Fî 18 Muharrem sene 1110 Şuhûdü’l-hâl: el-Hâc Abdülbaki Efendi b. el-Hâc Musa, İbrahim Efendi b. Mustafa, Mehmed Çelebi b. Mustafa, İsmail Efendi b. Mahmud, Abdurrahman Efendi b. Mehmed.