Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 147 Hüküm no: 62 Orijinal metin no: [21a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım vefat eden kocası Miskçi Salih’in çocuklarının mallarını korumak ve işlerini yürütmek üzere kendisini vasi tayin ettiğini ispat ettiği Mahmiye-i İstanbul’da Arabacı Bayezid mahallesi ahâlîsinden olup bundan akdem fevt olan miskci tâifesinden el-Hâc Salih b. Abdülfettah’ın evlâd-ı sıgārı Mustafa ve Saliha ve Fâtıma’nın tesviye-i emrlerine vasiyy-i muhtârları olduğu[nu] iddi‘â eden zâtı ta‘rîf-i şer‘î ile mu‘arrefe olan bâ‘isetü’l-kitâb müteveffâ-yı mezbûrun zevce-i menkûha-i metrûkesi Âişe Hatun bt. Abdullah mahfil-i kazâda sıgār-ı merkūmûnun tesviye-i emrlerine li-ecli’d-da‘vâ vasî nasb olunan Mustafa Çelebi b. Mehmed mahzarında üzerine da‘vâ ve takrîr-i kelâm edip zevcim müteveffâ-yı mezbûr el-Hâc Salih b. Abdülfettah hâl-i marazında bi-emrillâhi te‘âlâ fevt olduğumda evlâd-ı sıgārım Mustafa ve Saliha ve Fâtıma’nın emrlerini tesviye ve mal-ı müntakilleri hîn-i sedâdlarına varınca zabt ve hıfz oluna [deyü] vasiyet edip tenfîzine beni huzûr-ı Müslimînde vasî nasb ve ihtiyâr ve ta‘yîn ettikde ben dahi muvâcehesinde ba‘de’l-kabûl musırran alâ-îsâihî vefât etmekle vasiyet-i merkūmeyi tenfîzime vasiyy-i mansûb-ı merkūm mâni‘dir suâl olunsun dedikde isre’s-suâl ve’l-inkâr müdde‘iye-i merkūme[den] müdde‘âsına beyyine taleb olundukda udûl-ı Müslimînden olup mahmiye-i merkūmede Çavuş Mescidi mahallesinde el-Hâc Mehmed b. Ömer ve Zeyrek mahallesinde sâkin Ahmed b. Mahmud li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müteveffâ-yı mezbûr el-Hâc Salih b. Abdülfettah hâl-i marazında bi-emrillâhi te‘âlâ fevt olduğumda evlâd-ı sıgārım Mustafa ve Saliha ve Fâtıma’nın emirleri tesviye ve mal-ı müntakilleri hâl-i sedâdlarına varınca zabt ve hıfz oluna deyü vasiyet edip tenfîzine zevcesi işbu müdde‘iye-i mezbûre Âişe Hatun’u huzûrumuzda vasî [nasb] ve ihtiyâr ve ta‘yîn ettikde ol dahi muvâcehesinde ba‘de’l-kabûl mısırran alâ-îsâihî vefât eyledi [21b] biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde şehâdetleri makbûle olmağın mûcebiyle ba‘de’l-hükm mâ-vaka‘a kayd-şüd. Fî 16 Zilka‘de sene 1109 Şuhûdü’l-hâl: es-Seyyid Hasan b. Şa‘bân, Mehmed b. Abdullah. Osman Çelebi b. Hüseyin, Ahmed b. Süleyman, Nurullah b. Mehmed, Hasan b. Abdullah.