Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 148 Hüküm no: 63 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yako, Kamal ve Menteş Yahudilerin vefat eden Ahmed Efendi’de olan alacaklarından borçlulara dağıtılan hisselerini terekeden teslim aldıkları Mahmiye-i Edirne’de Kaleiçi’nde sâkin Yako v. İlya v. Mosi ve Kamal v. Mosi v. İsak ve Mentati (Menteş) v. Kamal v. İlya nâm Yahûdiler taraflarından mazmûnu müsbet hüccet-i şer‘iyye ile vekîl olduğu sâbit İlya v. Mosi nâm Yâhûdi mahfil-i kazâda mahmiye-i İstanbul’da Güngörmez mahallesi ahâlîsinden olup düyûnu terekesinden ezyed olduğu hâlde vefât eden merhûm Ahmed Efendi’nin tesviye-i umûruna kıbel-i şer‘den vasî ve kayyım nasb olunmağla tereke-i kāsırasına vaz‘-ı yed eden hâfızü’l-kitâb es-Seyyid Mehmed Çelebi b. Ahmed mahzarında bi’l-vekâle takrîr-i kelâm edip merhûm-ı mezbûr Ahmed Efendi b. Mustafa’nın terekesi tahrîr ve ba‘de ihrâci’l-mesârif ber-mûceb-i defter-i kassâm-ı askerî müvekkillerim merkūmûnun ber-mûceb-i hüccet-i şer‘iyye dokuz bin üç yüz otuz bir guruş hakk-ı müsbetleri mukābelesinde guremâdan isâbet eden sekiz yüz kırk bir guruşu terekeden olmak üzere vasiyy-i mezbûr yedinden vekâletim hasebiyle tamâmen alıp kabz eyledim min-ba‘d meblağ-ı merkūm sekiz yüz kırk bir guruşdan vasiyy-i mezbûr es-Seyyid Mehmed Çelebi yedinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ-vaka‘a kayd-şüd. Fî 18 min-Muharrem sene 1110 Şuhûdü’l-hâl: Mahmud Ağa b. Mehmed, Abdullah Efendi b. Ahmed, Süleyman Efendi b. Ahmed, Hüseyin Çelebi b. Yusuf, Ahmed Çelebi b. Süleyman, el-Hâc Mehmed b. Abdullah.