Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 149 Hüküm no: 64 Orijinal metin no: [21b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haffaf Mehmed’in varisleri kendilerine intikal eden evi müştemilatıyla birlikte Çukadar Abdullah’a sattıkları Husûs-ı âti’l-beyânın mahallinde tahrîri iltimâs olunmağın irsâl olunan Mevlânâ es-Seyyid Abdülmuti Efendi işbu sene-i mübârekede hacc-ı şerîfe gider iken Mısr-ı Kāhire’de vefât eden Haffâf el-Hâc Mehmed b. Ömer’in hayâtında mahmiye-i İstanbul’da Hoca Üveys mahallesinde sâkin olduğu menziline varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i şerîf eyledikde müteveffâ-yı mezbûrun hasren vârisleri olan zevce-i metrûkesi Saraylı Ümmühani bt. Abdullah ve sulbiye kebîre kızları Fâtıma <> ve Ümmügülsüm nâm hatunlar taraflarından husûs-ı âti’l-beyânda vekîl olduğu zâtlarını ma‘rifet-i şer‘iyye ile ârifân mahalle-i mezbûre sükkânından el-Hâc İsmail b. Musa ve İbrahim Çelebi b. Hüseyin şehâdetleri ile şer‘an sâbit olan mezbûre Ümmügülsüm’ün zevci Osman Ağa b. Hasan meclis-i ma‘kūd-ı mezbûrda işbu râfi‘ü’l-kitâb Çukadâr el-Hâc Abdullah Beşe b. Mehmed mahzarında ikrâr ve takrîr-i kelâm edip müvekkilât-ı merkūmât müteveffâ-yı mezbûr el-Hâc Mehmed b. Ömer’in terekesinden olup mahmiye-i mezbûrede Aydın Kethüdâ mahallesinde vâki‘ bir tarafdan Cevrî Çelebi Vakfı ve bir tarafdan Ramazan Efendi Vakfı ve bir tarafdan el-Hâc Bayram mülkü ve bir tarafdan tarîk-i âmla mahdûd iki fevkānî oda ve bir dehliz ve bir tahtânî oda ve bir su kuyusu ve bir mahtab ve bir kenîf ve cüneyneyi müştemil mülk menzilini bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık bey‘-i bâtt-ı kat‘î ile mezbûr Çukadâr el-Hâc Abdullah’a yüz yirmi guruşa bey‘ ve teslîm ol dahi iştirâ ve kabûl ve tesellüm ettikden sonra semeni olan meblağ-ı mezbûr yüz yirmi guruşu merkūm el-Hâc Abdullah yedinden tamâmen ahz u kabz eylediler ba‘de’l-yevm menzil-i mahdûd-ı mezbûr cümle müştemilâtıyla merkūm el-Hâc Abdullah’ın mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Hüseyin Çelebi b. Mehmed ile meclis-i şer‘a gelip inhâ etmeğin mâ-vaka‘a kayd-şüd. Fî 10 min-Muharrem sene 1110 Şuhûdü’l-hâl: İmâm Mustafa Efendi b. Veli, Mehmed Ağa b. Hasan, Bektaş Ağa b. Mustafa, el-Hâc İsmail b. Musa, el-Hâc İbrahim b. Hüseyin, Hüseyin Çelebi b. Mehmed.