Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 150 Hüküm no: 65 Orijinal metin no: [21b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beyhan Sultan’ın kethüdası Abdurrahim Ağa’nın küçük çocuklarının mallarını korumak ve işlerini yürütmek üzere Ali Efendi’nin vasi tayin edildiği Mahmiye-i İstanbul’da Mevlevîhâne-i Yenikapı dâhilinde Evliyâ Mehmed Efendi mahallesi ahâlîsinden olup bundan akdem izzetlü ve sa‘âdetlü Beyhan Sultan hazretlerinin kethüdâ-yı şerefîleri (şerîfleri) olan Abdurrahim Ağa b. Şa‘bân’ın sagīre kızları Âişe ve Fâtıma ve sagīr oğlu Ahmed’in babaları müteveffâ-yı mezbûrdan intikāl eden mallarını ahz u kabza ve tesviye-i emrlerine kıbel-i şer‘-i enverden bir vasî nasb ü ta‘yîn olunmak lâzım ve mühim olmağın emânet ve diyânet ile ma‘rûf ve vesâyet uhdesinden [gelmeğe] her vechile ehil olduğu zeyl-i kitâbda muharrerü’l-esâmî Müslimîn ihbârlarıyla lede’ş-şer‘i’ş-şerîf zâhir olan müşârün-ileyhâ sultan hazretlerinin hâlâ saray kâtibi mefharü’l-a‘yân işbu sâhibü’l-kitâb Ali Efendi b. Ahmed’i hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri tevsiye-i umûr-ı sagīr-i mezkûrîne vakt-i rüşd ü sedâdlarına varınca vasî nasb ü ta‘yîn buyurduklarında ol dahi vesâyet-i mezbûreyi ve hizmet-i lâzımesini kemâ-yenbağī edâya ta‘ahhüd ve iltizâm etmeğin mâ-vaka‘a kayd-şüd. Fî 26 min-Muharrem sene 1110 Şuhûdü’l-hâl: Ahmed b. Süleyman, Abdullah Ağa b. Abdullah, Ahmed Ağa b. Abdullah, Mustafa Ağa b. Abdullah, [22a] Ahmed Ağa b. Abdullah Kethüdâ-yı teberdârân, Abdurrrahman Efendi b. Bayram, Süleyman Ağa b. Mahmud, Veli Ağa b. Mehmed.