Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 613 Hüküm no: 758 Orijinal metin no: [134b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Simon v. Azar’ın vârislerinin menzillerini Bedros v. Andon’a satması Vilâyet-i Anadolu’da Eğin kazâsına tâbi‘ Apçağa nâm karye ahâlîsinden olup bundan akdem hâlik olan Simon v. Azar nâm zimmînin verâseti sulbî kebîr oğlu Dimayos ile sulbiye kebîre kızları Ogin ve Ağniye nâm nasrâniyelere münhasıra olduğu şer‘an mütehakkik oldukdan sonra mezbûr Dimayos asâleten ve mezbûretân Ogin ve Ağniye taraflarından husûs-ı âti’l-beyâna vekîl olduğu mezbûretânın zâtlarını ma‘rifet-i şer‘iyye ile ârifân karye-i mezbûre sükkânından Murad v. Karoh ve Toma v. Serkis nâm zimmîler şehâdetleriyle şer‘an sâbit olan mezbûre Ogin’in zevci Markar v. Andon nâm zimmî meclis-i şer‘-i şerîf-i enverde karye-i mezbûr ahâlîsinden işbu bâ‘isü’l-vesîka Bedros v. Margos nâm zimmî muvâcehesinde her biri asâleten ve vekâleten ikrâr ve takrîr-i kelâm edip akd-i âtî sudûruna değin mülk-i mûrisim olup medîne-i mezbûrede vâki‘ bir tarafdan Mazik? Bedros menzili ve bir tarafdan Hacı Levis menzili ve bir tarafdan Ovanes Papas menzili ve bir tarafdan tarîk-i âmla mahdûd tahtânî iki bâb oda ve iki çardak ve bir mikdâr havluyu müştemil menzilleri cümle tevâbi‘ ve levâhıkıyla tarafeynden îcâb ve kabûlü hâvî bey‘-i kat‘î ile mezbûr Bedros’a yüz otuz esedî guruşa bey‘ ve temlîk ol dahi iştirâ ve temellük ve kabûl ettiğinden sonra semeni olan meblağ-ı mezbûr yüz otuz guruşu mezbûr Bedros yedinden asâleten ve vekâleten tamâmen ahz u kabz eyledik min ba‘d menzil-i mezbûrda kat‘â alâka ve medhalim kalmadı mezbûr Bedros’un mülk-i müşterâsı olmuşdur mahallinde zabt ve tasarrufuna mezbûr Bedros’u taslît eyledik dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî 8 min Şevvâl sene [10]97. Şuhûdü’l-hâl: Sefer Çelebi b. Ahmed, Mahmud b. Receb, Ferrâş oğlu Mehmed, Ali Çelebi b. Osman, İbrahim b. Ahmed, Asvador v. Haçador, Hokadar v. Sogdar?, Markos v. Ohan?