Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 154 Hüküm no: 71 Orijinal metin no: [22b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Efendi’nin evini Mustafa Efendi’nin yetimlerinin vasileri Ümmühani Hatun’a istiğlâl sûretiyle sattıktan sonra kiraladığı Mahmiye-i İstanbul’da Mimâr Acem İsa mahallesinde sâkin es-Seyyid Abdullah Efendi b. el-merhûm es-Seyyid Mustafa Efendi b. Ali mahfil-i kazâda mahmiye-i mezbûrede Emin Nureddin mahallesinde sâkin [iken] fevt olan Mustafa Efendi b. Hüsemeddin’in evlâd-ı sıgārı Süleyman ve Mehmed ve Fâtıma’nın vâlideleri [ve] vasiye-i mensûbeleri olup zâtı ta‘rîf-i şer‘î ile mu‘arrefe olan hâfızatü’l-kitâb Ümmühani Hatun bt. Mehmed mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik zikr olunan Mimâr Acem mahallesinde vâki‘ lede’l-ahâlî ve’l-cîrân ma‘lûmü’l-hudûd dâhiliye ve hâriciye büyût-ı adîdeyi müştemil mülk menzilimi beş yüz guruşa bi-tarîkı’l-istiğlâl vasiye-i mezbûre Ümmühani’ye bey‘ u temlîk ve teslîm ol dahi mal-ı sagīrler ile iştirâ ve temellük ve tesellüm ve kabz u kabûl eyledikden sonra semeni olan meblağ-ı mezbûr beş yüz guruşu zikr olunan sagīrlerin Bezzâzistân’da mahfûz mal-ı müntakillerinden olmak üzere vasiye-i mezbûre Ümmühani yedinden tamâmen alıp kabz eylediğimden sonra menzil-i mahdûd-ı mezbûru vasiye-i mezbûre Ümmühani ba‘de’t-tahliyeti’ş-şer‘iyye ve’t-tekābüzi’l-mer‘î târîh-i kitâbdan üç yüz altmış güne değin bana yetmiş beş guruşa îcâr ve teslîm ben dahi vech-i muharrer üzere istîcâr ve tesellüm ve kabz eyledim dedikde gıbbe’t-tasdîkı’ş-şer‘î kayd-şüd. Fî 20 M sene [1]110 Şuhûdü’l-hâl: İsmail Efendi b. Parmakzâde, el-Hâc Ömer b. Himmet, Halil Çelebi b. Abdullah, Pîrîzâde Mehmed, Ahmed b. Süleyman.