Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 154 Hüküm no: 72 Orijinal metin no: [22b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serkis’in vefat eden Serkâtib Ahmed Ağa’daki alacağının terekeden ödenip rehin bırakılan eşyaların alınması Dergâh-ı âlî kapıcıbaşılarından olup bundan akdem medyûnen vefât eden Ser-kâtib merhûm Ahmed Ağa b. Mustafa’nın dâyinlerinden olup mahmiye-i İstanbul’da Hocahanı’nda sâkin işbu bâ‘isü’l-vesîka Serkis v. Şemun nâm zimmî mahfil-i kazâda müteveffâ-yı mezbûrun zevce-i metrûkesi Rukiye Hatun bt. el-merhûm İsmail Ağa’nın vekîl-i müsecceli Abdullah Ağa b. Haydar Paşa ile müteveffâ-yı merkūmun tesviye-i umûruna taraf-ı şer‘den mansûb vasîsi olmağla terekesine vaz‘-ı yed eden İsmail Ağa b. Hüseyin mahzarlarında üzerlerine da‘vâ ve takrîr-i kelâm edip yedimde olan işbu deyn temessüğü mûcebince bin yüz [23a] sekiz senesi Zilhiccesi gurresinde mezbûr Ser-kâtib Ahmed Ağa b. Mustafa’ya hayâtında yüz yirmi guruşumu idâne ve teslîm ol dahi yedimden istidâne ve kabz edip mukābelesinde işbu serâsere kaplı iki paça samur kürk ve bir Şam dîbâsı kaftan ve bir kırmızı kadife şalvarını bana rehin vaz‘ ve teslîm ben dahi irtihân ve kabz edip kable edâi’d-deyn ve fekk-i rehn mezbûr Ahmed Ağa fevt olmağla suâl olunup terekesinden edâ-i deyn ve fekk-i rehniyete tenbîh olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrdan sıdk-ı makāline beyyine taleb olundukda udûl-ı Müslimînden Dâye Hatun mahallesi sükkânından Musa Bey b. Yusuf ve merhûm-ı merkūmun şâtırı İbrahim Bey b. İsmail li-ecli’ş-şehâde meclis-i şer‘a hâzırân olup istişhâd olundukda fi’l-vâki‘ işbu deyn temessüğü mûcebince müdde‘î-i mersûm Serkis v. Şemun bin yüz sekiz senesi Zilhiccesi gurresinden müteveffâ-yı mezbûr Ser-kâtib Ahmed Ağa b. Mustafa’ya hayâtında yüz yirmi guruşu bizim huzûrumuzda idâne ve teslîm mezbûr Ahmed Ağa dahi yedinden istidâne ve kabz edip mukābelesinde işbu serâsere kaplı iki samur paça kürk ve bir Şam dîbâsı kaftan ve bir kırmızı kadife şalvarını mezbûr Serkis’e rehin vaz‘ ve teslîm ol dahi irtihân ve kabz edip kable’l-edâi’d-deyn ve fekki’r-rehn vefât eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olup müdde‘î-i mezbûr Serkis tahlîf-i şer‘î ile tahlîf olundukdan sonra mûcebince ba‘de’l-hükm müteveffâ-yı mezbûrun terekesinden edâ-i deyn ve fekk-i rehne vasiyy-i mezbûr İsmail Ağa ile vekîl-i merkūm Abdullah Ağa’ya tenbîh olunup mâ-vaka‘a kayd-şüd. Fî 25 Muharrem sene 1110 Şuhûdü’l-hâl: Mustafa Efendi ed-dâyin, el-Hâc Hüseyin b. Hamza, es-Seyyid Mehmed Efendi el-Müderris, Hüseyin Çelebi b. Mehmed, Yahya Çelebi b. Hulvan, Hasan Çelebi b. Abdi, Hüseyin Ağa b. İbrahim, el-Hâc Abdullah Çukadâr, Ahmed Çelebi b. Süleyman.