Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 155 Hüküm no: 73 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun’un vefat eden kocası Camcı Hüseyin’deki mehir bedelinin terekeden ödenmesi Mahmiye-i İstanbul’da Çinilihamam kurbünde sâkin iken düyûnu terekesinden ezyed olduğu hâlde vefât eden Camcı es-Seyyid Hüseyin Çelebi b. es-Seyyid Veli’nin zevce-i menkûha-i metrûkesi olup zâtı es-Seyyid Musa Çelebi b. es-Seyyid Mahmud ve Kadri Beşe b. Abdülfettah ta‘rîfleriyle mu‘arrefe olan bâ‘isetü’l-kitâb Emine bt. el-Hâc Hasan mahfil-i kazâda müteveffâ-yı mezbûrun vasiyy-i muhtârı olmağla terekesine vaz‘-ı yed eden es-Seyyid Mehmed Çelebi b. es-Seyyid Ahmed mahzarında üzerine da‘vâ ve takrîr-i kelâm edip müteveffâ-yı mezbûr hayâtında târîh-i kitâbdan on üç sene mukaddem yüz guruş mehr-i müeccel tesmiyesiyle huzûr-ı Müslimînde beni tezevvüc ve kabûl edip akd-i nikâh beynimizde kāim iken meblağ-ı merkūmu kable’l-edâ fevt olmağla tereke-i kāsırasından taleb ederim suâl olunsun dedikde gıbbe’s-suâl vasiyy-i mezbûr cevâbında terekesine vech-i muharrer üzere vaz‘-ı yedini ikrâr ve müdde‘iye-i mezbûrenin müdde‘âsını inkâr edicek müdde‘iye-i mezbûreden müdde‘âsına beyyine taleb olundukda udûl-ı Müslimînden mahmiye-i mezbûrede Cebecibaşı mahallesinde sâkin mezbûr Kadri Beşe ve es-Seyyid Musa Çelebi li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr es-Seyyid Hüseyin Çelebi b. es-Seyyid Veli b. es-Seyyid Mahmud hayâtında târîh-i merkūmda işbu müdde‘iye-i mezbûreyi yüz guruş mehr-i müeccel tesmiyesiyle huzûrumuzda tezevvüc ve kabûl edip akd-i nikâh beynlerinde kāim iken vefât eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm mâ-vaka‘a kayd-şüd. Fî 12 Muharrem sene 1110 Şuhûdü’l-hâl: Mukayyid Mustafa Efendi b. Mehmed, Kara Mehmed b. Hüseyin, Hüseyin Çelebi b. Mehmed, Ahmed Çelebi b. Süleyman, İbrahim Beşe b. Musa, es-Seyyid Abdullah Efendi İbâdzâde.