Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 613 Hüküm no: 759 Orijinal metin no: [135a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Beşe b. Mehmed’in Mehmed b. Mehmed’e olan borcunun vârislerince ödenmesi Dergâh-ı âlî yeniçerilerinin Otuzbirinci Ağa bölüğüne mahsûs oda ahâlîsinden olup medîne-i Belgrad’da mütemekkin iken bundan akdem vefât eden Kürdoğlu Mustafa Beşe b. Mehmed’in verâseti zevcât-ı metrûkâtı Hürşah ve Âliye ve Fatko? nâm hâtunlar ile li ebeveyn karındaşları el-Hâc Ebûbekir ve Mahmud ve Ayşe’ye münhasıra olup şer‘an zâhir ve müte‘ayyin oldukdan sonra mahmiye-i İstanbul’da Oruc Gāzi mahallesi ahâlîsinden işbu bâ‘isü’l-kitâb el-Hâc Mehmed b. Mehmed nâm kimesne meclis-i şer‘-i şerîf-i enverde tereke-i müteveffâ-yı mezbûre bi’l-verâse vâzı‘ü’l-yed olan mezbûr el-Hâc Ebûbekir mahzarında üzerine da‘vâ ve takrîr-i kelâm edip mezbûr Mustafa Beşe zimmetinde cihet-i karz-ı şer‘îden dört yüz esedî guruş hakkım olup meblağ-ı mezbûrdan yüz esedî guruşunu bana edâ ve teslîm ben dahi ahz u kabz edip ve yine bundan sonra nakid ve iki kürk bahâlarından cem‘an doksan guruşun dahi hayâtında bana teslîm ben dahi ahz u kabz edip mezbûr Mustafa Beşe meblağ-ı bâkī iki yüz on guruş ile beni mahmiye-i mezbûrda Kilid hanında sâkin Kilidçi Sefer demekle ma‘rûf Ağya v. Sefer nâm Ermeni üzerine havâle ve her birimiz ba‘de’l-kabûl mezbûr Ağya müflisen hâlik olup ba‘de sübûti’l-yevm mezbûr Mustafa Beşe’ye kable’l-mürâfa‘a mezkûr Mustafa Beşe dahi vefât edip terekesin veresesi kabz etmeğin hâlâ mezbûr el-Hâc Ebûbekir [ile] mürâfa‘a ve meblağ-ı mezbûr iki yüz on guruşu tereke-i müteveffâ-yı mezbûrdan bana edâya tenbîh olunmak matlûbumdur dedikde gıbbe’s-suâl mezbûr el-Hâc Ebûbekir cevâbında fi’l-hakīka mûrisi müteveffâ-yı mezbûrun müdde‘î-i mezbûra bâlâda tafsîl olan minvâl üzre cihet-i mezkûreden kabzını i‘tirâf eylediğinden mâ‘adâ iki yüz on esedî deyni olduğunu ve havâle-i mezbûreyi ikrâr lâkin mezbûr Ağya’nın müflisen hâlik olduğunu inkâr ve yesârına beyyine ityânından izhâr-ı acz etmekle mezbûr el-Hâc Mehmed’den hâlik-i mezbûr Ağya’nın müflisen mürd olmağla bu ânın sübûtuna beyyine taleb olundukda Vâlide hanında sâkin tüccâr-ı zevi’l-iktidârdan es-Seyyid Selahaddinzâde es-Seyyid Abdülkerim Çelebi ve Mehmed Çelebi b. Abdullah nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ hâlik-i mezbûr Kilidçi Ağya demekle şehîr mezbûr Ağya v. Sefer üzerine lâbis olduğu köhne libâsından gayrı ism-i mâl ıtlâk olunur şeyi olmayıp müflis ve mu‘dim olduğu hâlde hâlik olmağla müdde‘î-i mezbûr için müteveffâ-yı mezbûrun terekesine hakk-ı mürâca‘at vardır biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiyye şehâdetleri makbûle olmağın ba‘de’t-tahlîfi’ş-şer‘î ba‘de’l-hükm mâ vaka‘a bi’t-taleb ketb olundu. Fi’l-yevmi’s-sâmin min Şevvâli’l-mükerrem li sene seb‘a ve tis‘în ve elf. Şuhûdü’l-hâl: Mehmed Efendi b. Mustafa, Mustafa Çelebi b. Ahmed, Mustafa Çelebi b. Abdurrahman, İbrahim Çelebi b. Ahmed.