Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 162 Hüküm no: 79 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ali’nin vereseleri murislerinin vefat eden Kaz Ahmed Ağa’da alacağı olduğunu ispat ettiklerinden borcun Kaz Ahmed’in terekesinden ödenmesi Mahmiye-i İstanbul’da Sofular mahallesinde sâkin iken bundan akdem vefât eden el-Hâc Ali Ağa b. Murad’ın kebîr oğlu el-Hâc Ahmed asâleten ve sagīr oğlu Mustafa’nın li-ebeveyn ammi ve vasiyy-i muhtârı Bezzâzistânî el-Hâc Mustafa Ağa vesâyeten mahfil-i kazâda mahmiye-i mezbûrede İskender Paşa mahallesinde sâkin iken bundan akdem vefât eden Kaz Ahmed Ağa b. Kasım’ın vasiyy-i muhtârı olmağla terekesine vaz‘-ı yed eden eş-Şeyh Ebubekir Efendi b. eş-Şeyh Ali Efendi mahzarında üzerine da‘vâ ve takrîr-i kelâm edip müteveffâ-yı mezbûr Kaz Ahmed Ağa b. Kasım’ın mûrisimiz müteveffâ-yı evvel mezbûr el-Hâc Ali Ağa’ya işbu temessük mûcebince otuz dört buçuk guruş deyni olmağla mukābelesinde işbu bir sîm gaddâre ve bir dipliği bakır çukadâr gaddâresi ve bir sîm kılıç ve bir sîm kemer rahtını rehin vaz‘ u teslîm edip hattâ hayâtında şuhûd mahzarında ikrâr ve işhâd ettikden sonra dört buçuk guruşunu edâ edip meblağ-ı bâkī otuz guruşu kable’l-edâ ve’l-fek fevt olmalarıyla terekesinden edâ-i deyn ve fekk-i rehniyete tenbîh olunmak matlûbumdur dediklerinde gıbbe’s-suâl ve’l-inkâr müdde‘î-i mezbûrlardan müdde‘âlarına beyyine taleb olundukda Kocamustafapaşa mahallesinde sâkin Hüseyin Çelebi b. Abdullah ve Abdüsselam b. el-Hâc İshak li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Kaz Ahmed Ağa b. Kasım hayâtında müteveffâ-yı evvel el-Hâc Ali Ağa’ya eşyâ bahâsından otuz dört buçuk guruş zimmetinde deyni olup mukābelesinde eşyâ-i mezkûresini irhân ve teslîm eyledikde huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm meblağ-ı mezbûr otuz guruşu terekeden edâ-i deyn ve fekk-i rehne vasiyy-i mûmâ-ileyh eş-Şeyh Ebubekir Efendi’ye tenbîh birle mâ-vaka‘a kayd-şüd. Fî 28 Muharrem sene 1110 Şuhûdü’l-hâl: Fahrü’l-müderrisîni’l-kirâm es-Seyyid Abdülmuti Efendi, Nuh Efendi b. Musa, Mehmed Efendi b. Ebubekir, el-Hâc Mehmed Efendi b. el-Hâc Sunullah, Hasan Çelebi b. Abdullah.