Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 163 Hüküm no: 80 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Akil ve bâliğ olduğunu ispat eden Osman’a babası Sağır Mehmed’den intikal eden hissesini vasisi olan validesi Mülayim Hatun’un teslim etmesi Mahmiye-i İstanbul’da Küçükpazar kurbünde Hoca Hayreddin mahallesi ahâlîsinden olup bundan akdem vefât eden Sağır el-Hâc Mehmed b. Ömer’in oğlu ve sin ve cüssesinin bülûğa tahammülü ve bülûğuna rüşdünün inzimâmını iddi‘â eden işbu bâ‘isü’l-kitâb Osman mahfil-i kazâda hâl-i sıgārında tesviye-i umûruna vasiyy-i mansûbesi ve vâlidesi olup zâtı ta‘rîf-i şer‘î ile mu‘arrefe ve hisse-i müntakilesine vâzı‘atü’l-yed olan Mülayim bt. Abdullah nâm hatun muvâcehesinde üzerine da‘vâ ve takrîr-i kelâm edip hâlen ben âkıl ve bâliğ ve bülûğuma rüşdüm munzam olup umûrumda i‘ânet-i vasîden müstağnî olmağla babam müteveffâ-yı mezbûrdan müntakile hisse-i irsiyemi mezbûre Mülayim Hatun’dan taleb ederim suâl olunsun dedikde gıbbe’s-suâl mezbûre Mülayim Hatun cevâbında hisse-i irsiyesine ber-vech-i muharrer vaz‘-ı yedini ikrâr lâkin müdde‘î-i mezbûrun ber-vech-i mübeyyin müdde‘âsını inkâr edicek müdde‘î-i mezbûrdan sıdk-ı makāline beyyine taleb olundukda udûl-ı Müslimînden mahalle-i mezbûrede sâkin Hüseyin Çelebi b. Mustafa ve mahmiye-i mezbûrede Haraccı Kara Mehmed mahallesi ahâlîsinden İbrahim b. Mehmed li-ecli’ş-şehâde mahfil-i kazâya hâzırân olup isre’l-istişhâd fi’l-hakīka işbu müdde‘î-i mezbûr Osman b. Mehmed hâlen âkıl ve bâliğ ve bülûğuna rüşdü munzam olup umûrunda i‘ânet-i vasîden müstağnîdir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm mâ-vaka‘a kayd-şüd. Fî gurreti Safer sene 1110 Şuhûdü’l-hâl: İsmail Efendi b. Yahya, Mehmed Efendi b. Mustafa, Yusuf b. Abdullah, Ahmed Çelebi b. Süleyman, Hasan b. Abdullah.