Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 168 Hüküm no: 85 Orijinal metin no: [25b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Senemar’ın vefat eden Nalıncızade Attar Mustafa’daki alacağının terekeden ödenmesi Husûs-ı âti’l-beyânın mahallinde istimâ‘ ve tahrî[ri] iltimâs olunmağın savb-ı şer‘den me’zûnen irsâl olunan Mevlânâ Ahmed Efendi b. el-merhûm İsmail Efendi mahmiye-i İstanbul’da Yeni Câmi‘ kurbünde vâki‘ Attârlar sûkunda İbrahim Çelebi b. Mustafa’nın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde Çine cemâ‘atinden olup mahmiye-i mezbûrede Unkapanı kurbünde sâkin bâ‘isü’s-sifr Sarrâf Senemar(?) v. Mosi nâm Yahûdi meclis-i ma‘kūd-ı mezbûrda mahmiye-i mezbûrede el-Hâc Hasan mahallesinde sâkin iken bundan akdem vefât eden Na‘lıncızâde Attâr el-Hâc Mustafa b. Mahmud b. Hasan’ın evlâd-ı sıgārı Hadîce ve Emine ve Safiye’nin tesviye-i emrlerine min-kıbeli’ş-şer‘ vasî nasb olunmağla terekesine vaz‘-ı yed eden mezbûr İbrahim Çelebi mahzarında üzerine da‘vâ ve takrîr-i kelâm edip müteveffâ-yı mezbûr hayâtında bin yüz dokuz senesi Şevvâli’nin evâilinde hâlâ mahmiye-i mezbûrede taraf-ı Devlet-i aliyye’den kahve içün yeni gümrükçü nasb olunan Abdullah Efendi’ye kendi emriyle beher ferdesi beşer yüz ellişer paraya olmak üzere on bir ferde kahvesinin gümrüğü olan cem‘an yüz elli bir guruş ve bir rub‘ guruşu malımdan def‘ u teslîm ve gümrük tezkiresini alıp târîh-i mezbûrda müteveffâ-yı mezbûr el-Hâc Mustafa’ya verdiğimde vech-i meşrûh üzere meblağ-ı mezbûr yüz [26a] elli bir guruş ve bir rub‘ guruş cihet-i mezbûreden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip meblağ-ı mezbûrun yüz beş guruşunu hayâtında ahz edip kırk altı guruş ve bir rub‘ zimmetinde bâkī kalmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mesfûrdan müdde‘âsına beyyine taleb olundukda udûl-ı Müslimînden Hocapaşa mahallesinde sâkin Attâr el-Hâc Halil b. el-Hâc Osman ve Dâye Hatun mahallesinde sâkin el-Hâc Ali b. Muhsin li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Mustafa b. Mehmed b. Hasan hayâtında târîh-i mezbûrda vech-i meşrûh üzere meblağ-ı mezbûr yüz elli bir guruş ve bir rub‘ cihet-i mezbûreden zimmetinde müdde‘î-i mezbûra vâcibü’l-edâ deyni olduğunu huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın kabzına mu‘terif olduğu yüz beş guruşdan mâ‘adâ meblağ-ı mezbûr kırk altı guruş bir rub‘ guruşu müteveffâ-yı mezbûrun hayâtında küllen ve ba‘zan ahz etmeyip veyâ âhara havâle ve’l-hâsıl turuk-ı şer‘iyyeden bir tarîkle zimmetini ibrâ ve iskāt etmediğine müdde‘î-i mesfûra yemîn teklîf olundukda ol dahi alâ-vefki’l-mesûl yemîn billâhi’l-aliyyi’l-a‘lâ etmeğin mûcebiyle ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû mürsel el-Hâc Abdullah ile meclis-i şer‘a gelip alâ-vukū‘ihi inhâ etmeğin mâ-vaka‘a kayd-şüd. Fî 23 min-Muharrem sene 1110 Şuhûdü’l-hâl: Ömer Ağa b. Mehmed, Osman Ağa b. Mehmed, el-Hâc Osman b. Kemâleddin, Mehmed Çelebi Müezzinzâde, Hasan Çelebi b. Hızır, Süleyman Çelebi b. Abdullah.